5 ДУГААР САРЫН 15-НААС ДӨРВӨН ТӨРЛИЙН ҮЙЛ АЖИЛЛАГААГ НЭЭХЭЭР БОЛЛОО

Улсын Онцгой Комиссын шийдвэрээр 5 дугаар сарын 15-наас дөрвөн төрлийн үйл ажиллагааг нээхээр боллоо. Өнөөдрийн байдлаар 18 төрлийн үйл ажиллагааг хязгаарласан байгаа. Эрдэмтэн судлаачдын саналыг үндэслээд зарим хязгаарлалтыг цуцлахаар болж байна. Тодруулбал:

·      Кофе шопыг танхимдаа 50 хувийн дүүргэлттэй,

·      Бүх төрлийн сургалтыг 10 хүртэлх хүнтэй,

·      Чийрэгжүүлэх төвүүдийг /Фитнес/

·      Бассейнүүдийг 50 хувийн дүүргэлттэй нээхээр боллоо.

Үйл ажиллагаагаа нээж байгаа үйлчилгээний газрууд вакцины бүрэн тунд хамрагдаад 14 хоносон иргэдэд үйлчлүүлэх зохицуулалттай байх юм. Нийслэл хотод вакцинд хамрагдах ёстой хүмүүсийн 95 хувь нь эхний тунд, 52 хувь нь давтан тунд хамрагдаад байгаа учраас тэдгээр иргэддээ үйлчилгээ нээж буй юм.

Урьдчилан мэдээлж байгаагийн шалтгаан нь тодорхой хэмжээнд дээрх байгууллагуудад бэлтгэл ажлаа хангах боломжийг нээж өгч байгаа юм.

Улсын Онцгой Комиссоос долоо хоногийн дараагаас нэмж 7 төрлийн үйл ажиллагааг нээхээр төлөвлөж байна. Хэдийгээр коронавируст халдварын тоо буурч байгаа ч нас баралт буурахгүй байна. Иймд бизнесийн байгууллагуудын үйл ажиллагааг тухайн нөхцөл байдалтайгаа уялдуулан үе шаттайгаар нээгээд явах юм.

Түүнчлэн орон нутаг руу зорчих хөдөлгөөнийг энэ сарын 22-ноос нээхээр төлөвлөж байна. Хот хооронд зорчих хөдөлгөөнийг зохицуулах журам батлагдсан. Одоогийн байдлаар иргэд нийслэлээс орон нутаг руу зорчихдоо очих аймгийнхаа онцгой комиссоос зөвшөөрөл авч байна. Харин 22-ноос эхлээд аймгийн онцгой комиссоос зөвшөөрөл авахгүй.

Хот хооронд зорчих иргэдийг вакцины хоёр тунд хамрагдаад 14 хоносон гэсэн баримтыг нь үндэслээд явуулна. Вакцинд хамрагдаагүй бол PCR шинжилгээ өгсөн байх шаардлагатай.