Финландад коронавирусний анхны тохиолдол бүртгэгджээ

Ухань хотоос Финландад ирсэн Хятадын жуулчин “2019-nCoV” вирусээр үүсгэгдсэн уушгины хатгалгаатай болох нь тогтоогдож, Финландын Рованиеми хотын эмнэлэгт хүргэгджээ. Энэ тухай Финландын Үндэсний эрүүл мэнд, нийгмийн хангамжийн хүрээлэн өнгөрсөн лхагва гарагт мэдэгдсэн байна.

Энэ нь Финландад бүртгэгдсэн коронавирусний анхны тохиолдол болж байна. Сүүлийн хоёр хоногт тавгүйрхэж эхэлсэн өвчтөн орон нутгийн эмчид хандсан бөгөөд одоогоор түүнийг тусгаарлаад байгаа аж. Үүнээс гадна өвчтөнтэй ойр холбоотой байсан 15 хүний биеийн байдлыг сүүлийн хоёр долоо хоногийн туршид ажиглах юм байна.

"Өвчний халдварын тохиолдол гарч болзошгүй байсанд Финланд бэлтгэлтэй байсан. Манай улсын эрүүл мэндийн тогтолцоонд төлөвлөгөө бий. Эмнэлгүүд халдварлагсдыг онцгой нөхцөлд эмчлэхэд бэлэн байна” хэмээн Үндэсний эрүүл мэнд, нийгмийн хангамжийн хүрээлэнгийн тэргүүн Мики Салминена мэдэгдсэн байна.