Ж.БАТБААТАР: “ҮНДЭСНИЙ ЦЭЦЭРЛЭГТ ХҮРЭЭЛЭН” ДЭЭР НОГООН БАЙГУУЛАМЖ БОЛОН ТОХИЖИЛТЫН АЖИЛ ӨРНӨЖ БАЙНА

Нийслэлчүүд бидний зорин очих дуртай газрын нэг “Үндэсний Цэцэрлэгт Хүрээлэн” ОНӨТҮГ хэмээх байгууллагын талаар уншигчид хэдийнээ мэдэх болсон. Сүүлийн үед хийж хэрэгжүүлж байгаа ажлууд нь олны нүдэнд харагдаж бас бодитоор мэдрэгдэх болсон билээ. Дэлхий нийтийг цочроосон цар тахлын дэгдэлттэй тэмцэж буй энэ хүнд цаг үед ч иргэдийн амарч салхилах орчныг бүрдүүлэн, бүх насныхныг спортоор хичээллэх боломжийг нь хадгалсаар байгаа. Бас Туул голын эх үүсвэрийг хамгаалж, цэнгэг агаар бэлэглэх ногоон байгууламжаа хадгалахын тулд жилийн дөрвөн улирлын турш тасралтгүй хичээн ажилладаг гэдгээр нь андахгүй. Энэ байгууллагын Дэд дарга Ж.Батбаатартай ярилцсанаа уншигч таньд хүргэе.    

-Танд энэ өдрийн мэнд хүргэе. Өөрийгөө товч  танилцуулаач.

-Намайг Жамъянжамцын Батбаатар гэдэг. Багш, эдийн засагч мэргэжилтэй. Нийгмийн удирдлагын магистр, докторант. Анх их сургуулиа төгссөний дараа гэрэлтүүлэг, хэвлэл, тохижилтын чиглэлээр компани байгуулан ажиллаж байгаад төрийн албанд тохижилт үйлчилгээ хариуцсан мэргэжилтэн, хэлтсийн дарга, дүүргийн Иргэдийн төлөөлөгчдийн хурлын төлөөлөгч гээд төр, хувийн хэвшилд нийт 17 жил хөдөлмөрлөжээ. Энэ ажлын туршлага дээрээ тулгуурлаж "ҮНДЭСНИЙ ЦЭЦЭРЛЭГТ ХҮРЭЭЛЭН"-гийн дэд даргаар томилогдон ажиллаж байна. 

-Танай байгууллагын хувьд хамгийн ачаалалтай байдаг сарууд үргэлжилж байна. Үүнтэй холбогдуулан ямар төлөвлөлт, зохион байгуулалт хийж байгаа бол?

-“Үндэсний Цэцэрлэгт Хүрээлэн” ОНӨТҮГ бол газар нутгийнхаа хэмжээгээр Азидаа эхний 6-рт, Монголдоо хамгийн томд зүй ёсоор тооцогддог. Нийслэлчүүдийн ая тухтай амарч зугаалах нөхцлийг бүрдүүлсэн 10 гаран жилийн түүхтэй, 140 гаруй мянган мод тарьж ургуулсан экологийн үржил бүхий  Үндэсний хэмжээний цэцэрлэгт хүрээлэн юм. Нийт 973 га газраас эхний ээлжийн 183 га газарт нь ногоон байгууламж, бүтээн байгуулалтын ажил хийгдсэн. Анх байгуулагдсан цагаас эхлэн нийслэлчүүдийн ундны усны эх үүсвэр газарт байрладаг  онцлогтой учир нийслэлийн холбогдох байгууллагуудаар ерөнхий төлөвлөгөөг батлуулан шат дараатайгаар улс, нийслэлийн төсөв, аж ахуйн нэгжийн хөрөнгө оруулалтаар өнөөдрийн нийслэлчүүд бидний амралт, чөлөөт цагаа өнгөрүүлэх орчныг бүрдүүлэн ажиллаж байгаа билээ. Дулааны улирал ирж бүтээн байгуулалтын ажил эхлэж байгаатай уялдуулан бидний зүгээс ч маш олон ажлуудыг хийхээр төлөвлөсөн. Өөрсдийн зүгээс шалтгаалах дотоод журам батлах, зураг эскизийн дагуу ажлыг үргэлжлүүлэх, засвар, арчлалтын ажлыг хийх зэрэг холбогдох бэлтгэл ажлыг бүрэн хангасан.

-“Үндэсний цэцэрлэгт хүрээлэн”-д одоо хийгдэж байгаа  бүтээн байгуулалтын ямар ажлууд байна. Та товчхон танилцуулаач?

-Үндсэндээ бүтээн байгуулалтын ажлууд маань дөрвөн хэлбэрээр явагдаж байна. Үүнд: Нэгдүгээрт Нийслэлийн төсвөөр хийгдэж буй ажлуудаас дурьдвал, ерөнхий төлөвлөгөөний дагуу баруун талын дугуйн зам, явган зам, ногоон байгууламж, гантиг чулуун талбай бүхий иж бүрэн тохижилтын ажил хийгдэж байна.

Мөн Маршалын гүүрнээс Улиастайн гүүр хүртэлх 7,2 км хоёр эгнээ дугуйн замын ажил нь гэрэлтүүлэг, дугуйн зогсоол, амралтын цэг, камержуулалт бүхий иж бүрэн тохижилтын ажлууд явагдаж байна. Тус ажил нь ерөнхий төлөвлөгөөнд тусгагдаагүй боловч иргэдийн хүсэлтэнд тулгуурлан нийслэлийн хөрөнгө оруулалтаар хийгдээд дуусах шатандаа явж байна. Хоёрдугаарт Албан байгууллага, аж ахуйн нэгж, хувийн хэвшлүүдтэй хамтран хийж буй бүтээн байгуулалтын ажлуудаас дурьдвал,  Хууль зүйн яам үүсгэн байгууллагдсаны 100 жилийн ойн хүрээнд баримал хийх, хуучин зам талбайг сэргээх, гэрэлтүүлэг нэмэх ажлыг гүйцэтгэж байна.    

Шүүхийн шийдвэр гүйцэтгэх ерөнхий газар тохижилт бүтээн байгуулалтыг хийж гүйцэтгэн, хүлээлгэж өгөхөд бэлэн болсон бол Зэвсэгт хүчний жанжин штабаас “Энхийг сахиулагчдын нэрэмжит төгөл” тохижилтын ажлыг 4 га талбай дээр Хот байгуулалт, хөгжлийн газраас тохижилтын ажлын даалгавар гаргуулан, загвар зургаа батлуулан ажлаа эхлүүлсэн байгаа. Мөн Цагдаагийн ерөнхий газраас орчин цагийн цагдаагийн байгууллага үүсч хөгжсөний 100 жилийн хүрээнд алдрын баримлыг байршуулан,  тохижилтын ажил, Ротари клубээс хөгжлийн бэрхшээлтэй хүүхдүүдэд зориулсан хүүхдийн тоглоомын талбайн тохижилтын ажил зэргийг хийж гүйцэтгэж байна.

Удахгүй Уул уурхай, хүнд үйлдвэрийн яам, Рагбигийн холбоо зэрэг байгууллагуудаас томоохон бүтээн байгуулалт хийхээр зургийн ажлууд нь явж байгаа.

Гуравдугаарт, 10 жилийн өмнөөс хийгдсэн тодорхой бүтээн байгуулалтын ажлуудыг засварлаж шинэчлэх ажлууд  байна. Үүнээс дурьдвал хөл бөмбөгийн талбайг засварлах ажлыг “Хурд групп”  нийгмийн хариуцлагынхаа хүрээнд 100 хувь өөрсдийн хөрөнгө оруулалтаар хийж байна. Удахгүй манай гурван теннисний талбайн засварыг “Жем Интернэшнэл” ХХК нийгмийн хариуцлагын хүрээнд хийж гүйцэтгэхээр болж, саналаа ирүүлээд байна.

Дөрөвдүгээрт, 10 гаран жилийн түүхтэй манай байгууллагад цагийн аясаар элэгдэж гандсан тодорхой тооны бүтээн байгуулалтууд ч олон бий. Үүнийг байнга шинээр солих, засварлах төсөв хөрөнгө бидэнд байдаггүй. Тэглээ гээд зүгээр хүлээж суулгүй өөрсдийн нөөц, боломжийг ашиглан аж ахуйн аргаар сэргээн засварлах ажлуудыг хийж гүйцэтгэсээр байна.  Нийт 3600 метр гадна хашааг будаж сэргээсэн бол, бүх сандлыг засварлаж өнгийг сэргээн будсан. Худгийн байрны гадна талыг шинэчлэх, хуучин тоглоомуудыг солих, гэрэлтүүлэг нэмэх, засварлах зэргээр дурдвал чамгүй олон ажлыг хийж гүйцэтгэжээ. Хог ангилж хаях зориулалтын хогийн сав шинээр тавихаар бэлдэж, худалдаа үйлчилгээ эрхлэгчдээ уриалан нохойн ялгадас хийх уутыг иргэдэд үнэгүй өгөх ажлыг бодлогоор  эхлүүлсэн зэргийг ч нэрлэж болно.

Иргэдэд үйлчилгээ үзүүлж буй үйлчилгээ эрхлэгчид болон ТҮЦ /түргэн үйлчилгээний цэг/-ийг нэгдсэн нэг стандарттай болгон,  гадна тохижилтыг ижил түвшинд хийлгэж, жигд хувцаслалттай, тодорхой байршлууд дээр нэгдсэн журмаар байрлуулах зэргээр  зохион байгуулалт дээр анхаарч ажиллаж байна.

-Үнэхээр их ажлыг эхлүүлж, чамгүй өөрчлөлтүүдийг хийжээ. Өнгөрсөн 10 жилийн хугацаанд та бүхэн  нийт газар нутгийнхаа 183 га буюу эхний ээлжийн хэсгийн ногоон байгууламж болоод тохижилт, бүтээн байгуулалтын ажлыг хийсэн гэж байна. Энэ талаараа тодорхой мэдээлэл өгвөл?

-Төлөвлөлтийн дагуу эхний ээлжинд 183 га талбайн бүтээн байгуулалт бүрэн дуусаагүй байгаа бөгөөд үүнээс 50 га талбай дээр бүтээн байгуулалтын ажлын нарийвчилсан экспертизээр орсон зургийн ажил бэлэн байгаа. Тус бүтээн байгуулалт хэрэгжихэд бэлэн зураг төсөлтэй 35 тэрбум төгрөгний хөрөнгө оруулалт шаардагдах зураг төсөл, бүтээн байгуулалт хийх тохижилтын ажлыг эхлүүлэхээр төлөвлөж хотын удирдлагуудад танилцууллаа. 183 га талбай дээр бол мод ургамал болон ногоон байгууламжийн ажил 90 гаруй хувьтай гэсэн үг.

Уг тохижилтын ажлын даалгаврын дагуу нийтдээ 110 гаруй га талбай дээр тохижилт бүтээн байгуулалт хийж болно. 520 га талбай дээр нь бол зөвхөн ногоон байгууламж, мод, бут, сөөг, зүлэгжүүлэлтийн ажил хийх болно гэсэн даалгавар гарсан байдаг. Үүн дээр зөвлөх үйлчилгээ буюу зургийн зардлыг тусгаж байж дараагийн мастер төлөвлөгөө яг 10 жилийнхээ ойн дээр дахиад бүтээн байгуулалт хийгдэх алсын хараа буюу 2030, 2040 оноо харсан бүтээн байгуулалтын томоохон хэмжээний зураг төслүүд гарахад бэлэн болсон.

2021 оны хувьд хамгийн том бүтээн байгуулалт, биеийн тамир, спортоо дэмжсэн үйл ажиллагаа бол Рагби, бейсболын спортын талбай Хот төлөвлөлт хөгжлийн газраас ажлын даалгавраа гаргуулан загвар зургандаа орчихсон явж байгаа. Загвар зураг гарсны дараагаар бүтээн байгуулалтын ажлууд эхлэхэд бэлэн болсон байна.

-“Үндэсний цэцэрлэгт хүрээлэн” ОНӨТҮГ бол нийслэлийн иргэдийг тав тухтай байлгахад тодорхой үүрэгтэй байгууллага.  Энэ утгаараа нийслэлээс хэрхэн дэмжлэг авч хамтарч ажилладаг вэ?

-Нийслэлийн Засаг дарга бөгөөд Улаанбаатар хотын захирагч Д.Сумьяабазар болон холбогдох байгууллагуудын удирдлагуудыг урин энэ жил болон ирэх жилүүдэд хийж гүйцэтгэх ажлуудаа танилцуулан мэдээлэл өгсөн.

Нийслэлийн удирдлагуудын зүгээс бүх талаар дэмжин ажиллахаа илэрхийлсэн бол эхний ээлжинд үлдсэн 660 га талбай дээр бүтээн байгуулалтын ажил хийх тохижилтын ажлын даалгаврыг гаргуулан мастер төлөвлөгөөг боловсруулж батлахад анхаарахаа илэрхийлсэн. Үүнийхээ дараа цаашид шат дараатай хөрөнгө оруулалтын ажлуудыг дэмжин ажиллахаар болсон. Нийслэлийн Захирагчийн ажлын албанаас мөн дэмжлэг үзүүлж дугуйн зам дагуух нарс мод тарьж өгсөн.

-Таны хувьд цаашид анхаарч, хэрэгжүүлэх ямар санал байдаг вэ?

-Сүүлийн үед иргэд, албан байгууллага, аж ахуйн нэгжүүдээс манай байгууллага дээр тохижилт хийе, хамтарч ажиллая гэж маш ихээр хандах болсон. Бидний зүгээс нэгдүгээрт манай ерөнхий төлөвлөгөөтөй уялдаж байна уу, иргэдийн хүсэн хүлээсэн ажил мөн үү, хөрөнгө санхүү шийдэгдсэн эсэх, удаан хугацаандаа ашиглагдах уу, чанар, өнгө, үзэмж зэргийг анхаарч үзэж байж албан ёсны хариуг өгч байгаа. Яагаад гэвэл хуучин хийсэн бүтээн байгуулалт, тохижилт нь эхнээсээ эвдэрч гэмтэн засварлах боломжгүй болж байна. Миний дээр дурьдсанчлан манай байгууллагад засварлах, солих ажилд тусгагдсан зардал гэж байдаггүй, чанаргүй, муу материалаар хийгдсэн ажил нь удахгүй эвдэрдэг. Харин тэр бүрийг нь хаячихаж болдоггүй, сэргээн засварлахаар хөрөнгө мөнгө их  шаардагддаг гэхчлэн асуудал үүсдэг. Иймд манай зүгээс чанар, стандартыг эрхэмлэн ерөнхий төлөвлөгөөтөйгөө уялдуулан ажиллах болно.

Дараагийн асуудал бол иргэдийн ухамсар, хариуцлага, үүргийн асуудал дээр хэлэх санал байна. Байгууллагын зүгээс бүх хүч боломж, бололцоогоо дайчлан ажиллаж байгаа гэтэл зарим иргэд маань санаатай, санаандгүй эвдэж сүйтгэх, архидан согтуурах, ил задгай хог хаях зэрэг ухамсаргүй үйлдлүүд ихээр гардаг.  Үүн дээр бид бүхэн анхаарч шат дараатай арга хэмжээг авах болно.

-Та хамт олныхоо талаар яриач?

-Тэгэлгүй яахав, баярлалаа. Энэ талаар заавал ярих ёстой. Юуны өмнө энэ том “Үндэсний хэмжээний цэцэрлэгт хүрээлэн”-г босгож өдий зэрэгт хүргэсэн хамт олноороо бахархаж явдаг шүү. Нийт ногоон байгууламж, цэцэрлэгжүүлэлт, төлөвлөлт, харуул, хамгаалалт, аж ахуй, захиргаа, санхүүгийн алба гээд 113 хүний бүтэц бүрэлдэхүүнтэй энэ хамт олон ийм том бүтээн байгуулалтын ажлыг эхлүүлж, арчлан хамгаалж, хариуцсаар ирсэн. Хоосон шахам тал газрыг өнөөдрийн нийслэлчүүд бидний зорин очих дуртай газрын нэг болгосон та бүхний минь амьдрал тарьж ургуулсан мод шигээ өөдөө өсөн дэвжих болтугай. Ерөнхий инженер А.Оюунгэрэл, төлөвлөлтийн албаны дарга Г.Уянга гээд анх байгууллагдсан цагаас нь эхлээд ажиллаж байгаа маш олон хүмүүс бий. Ийм сайхан орчинд гоё ажил хийж байгаа хүмүүс чинь цаанаа л тайван, тусархаг, ажлаа сайхан сэтгэлээсээ хийе гэсэн чин хүсэл, эрмэлзэлтэй хүмүүс байдаг даа.  Харин миний хувьд ерөнхий төлөвлөгөөтөйгөө уялдуулан гадаадын дэвшилтэт технологид суурьлан архитектор төлөвлөлтийг судлан томоохон бүтээн байгуулалт хийх юмсан гэсэн хүсэлтэйгээр ажиллаж байна.

-Ярилцсанд баярлалаа, ажлын амжилт хүсье ээ.