ДОТООД ХЭРГИЙН ИХ СУРГУУЛЬТАЙ ХАМТРАН АЖИЛЛАХААР БОЛЛОО

“Үндэсний цэцэрлэгт хүрээлэн” ОНӨТҮГ Дотоод хэргийн их сургуультай хамтран ажиллах санамж бичгийг өнөөдөр “Үндэсний цэцэрлэгт хүрээлэн” ОНӨТҮГ-ын дарга Ү.Оюунзул, Дотоод хэргийн их сургуулийн захирал, доктор профессор, цагдаагийн хурандаа П.Батбаатар нар байгууллаа. Энэхүү санамж бичгийн хүрээнд ногоон байгууламжийг нэмэгдүүлэх зорилгын дор Дотоод хэргийн их сургууль ирэх 2024 онд тохиох 90 жилийн ойдоо зориулан 90 мянган мод тарих, багш ажилчид болон оюутнуудад экологийн боловсрол олгох, байгаль орчин ногоон байгууламжийг хайрлан хамгаалж ДХИС-ийн оюутнууд “Үндэсний цэцэрлэгт хүрээлэн”-гийн талбайд “Эко эргүүл”-ээр ажиллан иргэдэд ёсзүйн шаардлага тавьж, хууль сахин биелүүлэхэд нь туслах зэрэг томоохон  ажлуудыг хамтран хийхээр болж байна.  

Туул голын ай сав дагуух газрыг цэцэрлэгжүүлэн ойжуулах, хотын иргэдийн ундны цэвэр усны нөөцийг нэмэгдүүлж, хамгаалалтыг сайжруулах зорилго бүхий “Үндэсний цэцэрлэгт хүрээлэн”  ОНӨТҮГ-ын 12 жилийн ой энэ онд тохионо. Энэ хүрээнд гадаад дотоод харилцаагаа өргөжүүлэн, төрийн болон төрийн бус байгууллагуудтай хамтран ажиллаж байгаагийн нэг нь Дотоод хэргийн их сургууль юм. Өнгөрсөн хугацаанд Дотоод хэргийн их сургуулийн сонсогч оюутнууд “Үндэсний цэцэрлэгт хүрээлэн”-гээр үйлчлүүлж буй иргэдийн тав тухыг  нэмэгдүүлэх, ногоон байгууламжийн арчилгааг сайжруулах зорилгоор хоёр удаагийн их цэвэрлэгээ хийж өгсөн.

Монгол Улсын Ерөнхийлөгчийн санаачилсан тэрбум мод  тарих үндэсний хөдөлгөөнд нэгдэж, байгууллага аж ахуйн нэгжид мод тарих зөвлөмж өгч,  мэргэжил аргазүйгээр ханган ажиллаж байгаа  “Үндэсний цэцэрлэгт хүрээлэн”-гийн үйл ажиллагааг дэмжин, олон талаар хамтран ажиллахаа Дотоод хэргийн их сургуулийн удирдлагууд санамж бичиг үзэглэх үеэр илэрхийлж байлаа.