Турк улс түүхэндээ анх удаа бүрэн дотооддоо үйлдвэрлэсэн автомашиныг танилцуулжээ. TOGG нэртэй Туркийн компаниудын консерциумын анхны бүтээгдэхүүн нь бүрэн цахилгаан хөдөлгүүртэй SUV ангиллын төмөр хөлөг болсон байна.
Зөвхөн зураг дизайнаа Италийн алдарт Пининфарина компаниар (Феррари, Масератигийн зураг дизайныг хийдэг) хийлгэсэн бол бусад бүх үйлдвэрлэлийг Турк улсад гүйцэтгэжээ.
Энгийн загвар нь бүрэн цэнэгээр 300 км зам туулах батарейтай, 200 морины хүчтэй хөдөлгүүртэй бол сайжруулсан загвар нь 480 км зам туулах батарей, 400 морины хүчтэй хосолсон хөдөлгүүрээр тоноглогдсон байна.
Хангалттай хүчтэй (150кВатт) цэнэглэгчээр 30 минутын хугацаанд батарейг нь 80 хувь хүртэл цэнэглэх боломжтой гэнэ.
Үүнээс гадна TOGG загварын автомашин нь хөдөлгөөний удаашралтай замд зориулагдсан автомат жолоодлогын Level 2 түвшний горимтой ажээ. Үүнийг ирээдүйд Level 3 түвшинд хүргэн сайжруулах боломжтой гэж үйлдвэрлэгч нь амласан байна.
TOGG-ийн үнийг зарлаагүй байгаа бөгөөд 2022 онд цэнэглэх станцын дэд бүтцийн хамт зах зээлд нэвтрүүлэхээр төлөвлөжээ. Мөн седан ангиллын бүтээгдэхүүн гаргах төлөвлөгөөтэй байгаа гэнэ.
