Bafta” кино наадмаас “1917” хамгийн олон шагнал хүртлээ

Их Британийн нийслэл Лондон хотноо өнгөрсөн ням гарагт зохион байгуулсан “Bafta” кино наадмаас дэлхийн нэгдүгээр дайны талаар өгүүлэх “1917” уран сайхны кино хамгийн олон буюу долоон шагнал хүртсэн байна.

"1917” киног бүтээсэн Английн найруулагч Сэм Мендес “Шилдэг кино”, “Их Британийн шилдэг кино”, “Шилдэг найруулагч”, “Шилдэг зураг авалт” зэрэг шагналуудыг хүртжээ. С.Мендес 2009 онд “Slumdog Millionaire” киногоороо “Шилдэг найруулагч”-ийн шагнал хүртсэн Дэнни Бойлоос хойш уг шагналыг хүртсэн анхны Английн найруулагч болжээ.

Энэ удаагийн "Bafta" наадмаас гурван шагнал хүртсэн “Joker” киноны гол дүрийн жүжигчин Хоакин Феникс “Шилдэг эрэгтэй дүр”-ээр шалгарчээ. Мөн Америкийн дуучин, жүжигчин Жуди Гарландын талаар өгүүлсэн “Жуди” киноны гол дүрийг бүтээсэн Рене Зеллвегер “Шилдэг эмэгтэй дүр” шагналын эзэн болжээ. Үүний зэрэгцээ БНСУ-ын найруулагч Бон Жун Хогийн бүтээл “Шимэгч” кино “Гадаад хэлээрх шилдэг кино”-гоор тодорсон байна.