“КИБЕР АЮУЛГҮЙ БАЙДЛЫН ТӨВ”-ИЙН НЭЭЛТ БОЛЛОО

2021-2024 оны Монгол Улсын Засгийн газрын үйл ажиллагааны нэгдсэн хөтөлбөрт мэдээллийн технологийг эдийн засгийн тэргүүлэх чиглэл болгохоор заасан. Мөн цахим үндэстэн болгох уриалгыг Монгол Улсын Засгийн газар гаргаад байгаа юм. Энэ ажлын хүрээнд “Эрдэнэт үйлдвэр” ТӨҮГ дэргэдээ ийнхүү”Кибер аюулгүй байдлын төв”-ийг ашиглалтад орууллаа. Тус төв дэлхийд эхний тавд эрэмбэлэгддэг Израйл улсын аюулгүй байдлын тоног төхөөрөмжийг кибер аюулгүй байдлын үйл ажиллагаандаа ашиглах бөгөөд Эрдэнэт үйлдвэрийн хэмжээнд 24 цагт 10-14 мянган мэдээллийн төрөл бүрийн халдлага, зохисгүй хандалтууд ирдэг байна. Иймээс үйлдвэрийн хэмжээнд кибер аюулгүй байдлын шаардлагатай арга хэмжээг авах, төрөл бүрийн мэдээллийн халдлагаас урьдчилан сэргийлэх зорилгоор тус төв байгуулагдав.“Эрдэнэт үйлдвэр” ТӨҮГ-ын ”Кибер аюулгүй байдлын төв” ашиглалтад орсноор цаашид үйлдвэрийн үйл ажиллагаа нь иргэдэд илүү нээлттэй, авлигалаас  ангид, тухайн байгууллагын ажиллагчдын сэтгэл ханамж өндөр байхад чухал үүрэг гүйцэтгэх юм. “Кибер аюулгүй байдлын төв”-ийн нээлтэд зориулан УИХ-ын гишүүн Н.Учрал цахим мэндчилгээ дэвшүүлэв. Тэрбээр: “Монгол Улсын их хурал, УИХ-ын хуульд нэмэлт өөрчлөлт оруулж, “Инноваци цахим бодлогын байнгын хороо”-г байгуулан ажиллаж байна. Өнгөрсөн хугацаанд тус хороо Хууль зүйн байнгын хороотой хамтран нийтийн мэдээллийн болон хувь хүний тухай хууль,цахим гарын үсгийн тухай хууль, кибер аюулгүй байдлын хуулийг УИХ-аас батлан гаргасан. Эдгээр хуулийг хэрэгжүүлэх зорилгоор Төрийн болон хувийн хэвшлийн байгууллагууд, Төрийн өмчийн үйлдвэрийн газрууд, мэргэжлийн холбоодод бэлтгэл ажлыг эхлүүлээд байна. Эдгээр хууль тавдугаар сарын 1-нээс хэрэгжиж эхэлнэ. Эрдэнэт үйлдвэр 2019 онд мэдээллийн технологийн хэлтсийг дэргэдээ байгуулж, архив албан хэрэг хөтлөлт, төрөлжсөн болон дагнасан  бие даасан системүүдийг амжилттай хэрэгжүүлж, эхэлсний үр дүнд Эрдэнэт үйлдвэрийн үйл ажиллагаа цахимжиж, мэдээлэл нээлттэй болж,мэдээллийн дэвшилттэй хөл нийлүүлэн алхаж байна. Мэдээллийн аюулгүй байдлын хуульд Төрийн өмчит үйлдвэрийн газрууд мэдээллийн аюулгүй байдлын төвийг дэргэдээ байгуулж ажиллах тодорхой чиг үүргийг тусгаж өгсөн. Энэхүү чиг үүргийг хэрэгжүүлэх үүднээс Эрдэнэт үйлдвэр манлайлан анх удаа дэргэдээ “Кибер аюулгүй байдлын төв”-ийг ажиллуулахаар болсонд талархаж, та бүхэнд ажлын өндөр амжилт хүсэн ерөөе”гэв.