Үхэр, хонины махны үнэ 1000-1500 төгрөгөөр өсжээ

Хүнсний бараа, бүтээгдэхүүний нийлүүлэлт, үнэ нийслэлд өнгөрсөн 7 хоногт хэвийн байв. 

"Хүчит шонхор" зах дээр үхрийн махны үнэ бөөний худалдаагаар кг нь 9000-9500 төгрөг, жижиглэнгийн үнээр кг нь 10.000-12.000 төгрөг болоод байна. Махны үнэ сүүлийн сард бага зэрэг өссөнийг махны худалдаачид нийлүүлэлт буурсантай холбон тайлбарлаж байна. 

Адууны мах кг нь бөөний үнээр 4200-6000 төгрөг, жижиглэнгийн үнэ 7500-8000 төгрөг байна. Адууны махны эрэлт байгаа боловч нийлүүлэлт мөн тааруу байна. Шинэ короновирусийн өвчлөлтэй холбоотойгоор махны эрэлт, хэрэгцээ өссөн хэдий ч хомсдол үүсэх боломжгүй гэдгийг ХХААХҮЯ-наас мэдээлж байгаа. Салбарын яамны мэдээгээр улсын нөөцөд 9 мянган тонн, нийлээд махны үйлдвэрүүд дээр 15 мянган тонн мах хадгалагдаж байна. 

Хүнсний бусад бараа, бүтээгдэхүүний үнэ: "Хүчит шонхор" зах дээр цагаан будаа кг нь 3500 төгрөг, "Алтан тариа" ХК-ийн дээд гурил кг нь 1400 төгрөг, I зэргийн гурил 1200 төгрөгийн үнэтэй байна. ОХУ-ын "Алейка" дээд гурил кг нь 2600 төгрөгөөр худалдаж байна. 

Гурилын хувьд манай улс өнгөрсөн 2019 онд 407 мянган тонн улаанбуудай хураан авсан. Үүнээс 240 мянган тонн буудайг гурилын үйлдвэрүүдэд нийлүүлсэн. Үйлдвэрүүд хэвийн ажиллаж байгаа. Энэ нь доотоодын хэрэгцээг эхний хагас жилд бүрэн хангах нөөцтэй байгааг ХХААХҮЯ мэдээлж байна. Мөн шаардлагатай үрийн хэрэгцээ, тэжээлийн болон үйлдвэрлэлд зориулсан будааны хэрэгцээ хангалттай байгааг мэдээлж байна.