“ХУВЬ ХҮНИЙ ХӨГЖИЛ ХАНДЛАГА” СЭДЭВТ СУРГАЛТ ЯВАГДАЖ БАЙНА

Авто тээврийн цехийн Зорчигч тээврийн хэсгийн автобуснууд Эрдэнэт үйлдвэрийн бүх ажиллагчдад үйлчилдэг. Энэ утгаараа үйлчлүүлэгчдээс гомдол санал их ирдэг аж. Сүүлийн таван жилд аюулыг мэдээлэх 71300 дугаарын утсанд жолооч нартай холбоотой, ажиллагчдаас ирсэн санал гомдолд судалгаа хийжээ. Үүнтэй уялдуулан Зорчигч тээврийн хэсэгт гаргасан санал гомдлыг арилгах зорилгоор тус цехийн ХАБ-ын алба санаачлан “Хувь хүний хөгжил хандлага” сэдэвт сургалт зохион байгуулж байна. Уг сургалтыг “Эрдэнэт” сувиллын цогцолборын их эмч Ц.Батаа, “Эрдэнэт цогцолбор” дээд сургуулийн Хүний хөгжлийн төвийн багш нар хамтран явуулж байгаа бөгөөд АТЦ-ийн 200 гаруй жолооч дөрвөн ээлжээр хамрагдаж байна. АТЦ-ийн Ерөнхий инженерийн ХАБЭА хариуцсан орлогч П.Пүрэвсүрэн: “Манай цехэд гарч буй аюултай тохиолдлуудын 70-80 хувь нь Уулын технологийн тээврийн хэсэгт гардаг. Сүүлийн 10 жилийн хугацаанд гарсан аюултай тохиолдлуудад судалгаа хийж, аюулыг дахин давтахгүй байх, урьдчилан сэргийлэх зорилгоор ажлын төлөвлөгөө гарган ажиллаж байна. Энэ ажлын хүрээнд “Эрдэнэт цогцолбор” дээд сургууль, “Эрдэнэт” сувиллын цогцолборын ажиллагчидтай хамтраад Уулын технологийн тээврийн хэсгийн жолооч нарын харилцаа, хандлагыг дээшлүүлэх, эрүүл зөв амьдрах, үйлдвэрт мөрдөж буй ХЭМАБ-ын дүрэм журам, аюултай байдлын судалгааг танилцуулах гурван сарын сургалт зохион байгуулж байна. Мөн ХАБ-ын албанаас холбогдох дүрэм журмыг мөрдүүлж, ажил гүйцэтгэх үеийн хөдөлгөөний хурд зэрэгт байнгын хяналт тавин ажилладаг. Энэ ажлын хүрээнд Белаз автомашинуудын тэвш өргөөтэй байхад жолоочийн бүхээгт гэрлэн болон дуут дохио өгдөг төхөөрөмж суурилууллаа. Сургалтын үр дүнгээс хамааран цаашид судалгаанд үндэслэн цехийн хэмжээнд тодорхой сэдвээр сургалтууд явагдана. Ингэснээр ажиллагсад ажлын байрандаа бүтээлч, хариуцлагатай байж, хамт олондоо зөв, эерэг уур амьсгалыг төлөвшүүлж, ажилдаа сэтгэл ханамжтай, урам зоригтой ажиллах нөхцөл бүрдэнэ” гэж ярилаа.