БАЯЖУУЛАХ ҮЙЛДВЭРИЙН ӨРГӨТГӨЛИЙН АЖИЛ АМЖИЛТТАЙ ЯВАГДАЖ БАЙНА

Эрдэнэт үйлдвэр цар тахлын хүнд үед үйл ажиллагаагаа хэвийн үргэлжлүүлж үйлдвэрлэлийн төлөвлөгөөг бүх үзүүлэлтээр нь давуулан биелүүлэв. Мөн үндсэн тоног төхөөрөмжөө солих, өргөтгөл шинэчлэлийн ажил ид явагдаж байна. Энэ оныг Эрдэнэт үйлдвэр их бүтээн байгуулалтын жил болгон зарласан. Үйлдвэр дээр хэрэгжиж буй бүтээн байгуулалтын  төслүүдийг оны эхний хагас жилд ашиглалтад оруулахаар шамдаж байна. Энэ талаар Ерөнхий захирлын нэгдүгээр орлогч бөгөөд Ерөнхий инженер Т.Батмөнхөөс тодруулахад, “Улс оны хэмжээнд цар тахлын дэглэм буурсан. Үйлдвэр бүрэн хүчин чадлаараа ажиллаж байна. Үйлдвэрлэлийн төлөвлөгөө биелж явна. Хил гааль дээр нэвтрээгүй хуримтлагдсан ачаа барааг татан авахаар Хөрөнгө оруулалт, худалдан авах ажиллагааны бодлогын газар, Тээвэр ложистикийн төв, төр захиргааны байгууллагуудтай хамтран ажиллаж байна. Эдгээр бараа материал, сэлбэг хэрэгсэл, тоног төхөөрөмжүүдийг татан авсан тохиолдолд угсралт суурилуулалтын ажил төлөвлөгөөний дагуу хийгдэнэ. Өөрөө нунтаглах хэсгийн дөрөвдүгээр шугамын бүтээн байгуулалтын ажил ид явж байна. Нунтаглан баяжуулах хэсгийн хам баяжуулалтын тавдугаар секцийн хүдэр боловсруулах хүчин чадлыг жилд 12 сая тонн болгон нэмэгдүүлнэ. Энэ шинэчлэлийн ажлыг 2020 оны наймдугаар сараас эхлүүлж, хуучин тавдугаар секцийг буулгах, шинэ секцийн суурь цутгах, төмөр хийц угсрах ажил бүрэн дууссан. Өмнө  нь баригдсан хам баяжуулалтын секцүүдтэй харьцуулахад хямд өртөгтэй. Энэ төсөл хэрэгжсэнээр өртгөө 2,5 жилд нөхнө” хэмээн онцлов.