ШИНЭ СЕКЦ ХОЁР ДАХИН ИЛҮҮ ХҮДЭР БОЛОВСРУУЛНА

 Баяжуулах үйлдвэрийн Өөрөө нунтаглах хэсгийн дөрөвдүгээр шугамын бүтээн байгуулалттай уялдуулан, Нунтаглан баяжуулах хэсгийн  хам баяжуулалтын тавдугаар  секцийн хүдэр боловсруулах хүчин чадлыг жилд 12 сая тонн болгон нэмэгдүүлэх шинэчлэлийн ажлыг 2021 оны тавдугаар сараас эхлүүлсэн. Уг секц өмнө нь жилд зургаан сая тонн хүдэр боловсруулах хүчин чадалтай байсан юм. Шинэчлэлийн   хүрээнд хуучин тавдугаар секцийг буулгах, шинэ секцийн суурь цутгах, төмөр хийцийг угсрах ажлыг бүрэн дуусгав. Одоогоор тоног төхөөрөмж угсрах ажил 50 хувьтай явна, хил дээр хүлээгдэж буй тоног төхөөрөмж, сэлбэг хэрэгсэл ирвэл хоёр сарын дотор шинэчлэлийн ажил дуусна, гэж Нунтаглан баяжуулах хэсгийн дарга Т.Гэрэлт-Од ярилаа. 

     Шинэ секцийн Wemco маркийн флотомашинууд  нь  өндөр бүтээмжтэй, овор хэмжээ багатай,  орчин үеийн  бүрэн автоматжуулсан камер болон хяналтын систем  бүхий төхөөрөмжөөр тоноглогдох юм. Мөн ашиглалтын зардал бага, найдвартай ажиллагаа сайтай, өнөөгийн болон ирээдүйд олборлох хүдрийн шинж чанарт тохирсон дөрвөн хувилбарт технологийн уян схемээр ажиллах боломжтой. Өмнө  нь баригдсан хам баяжуулалтын секцүүдтэй харьцуулахад хямд өртөгтэй бөгөөд уг төсөл өртгөө 2.5 жилд нөхнө, гэж мэргэжилтнүүд тооцож байна.