ОРХОН АЙМГИЙН ШИРЭЭНИЙ ТЕННИСНИЙ ХОЛБОО ШИНЭ ТЭРГҮҮНЭЭ СОНГОЛОО

  Орхон аймгийн Ширээний теннисний холбооны ээлжит хуралдаан энэ сарын 26-нд боллоо. Тус хуралдаанаар холбооны бүтэц, зохион байгуулалтыг шинэчилж, 2022 оны ажлын төлөвлөгөөг хэлэлцэн баталсан байна. Орхон аймгийн Ширээний теннисний холбооны Тэргүүнээр “Эрдэнэт үйлдвэр” ТӨҮГ-ын Ерөнхий захирлын нэгдүгээр орлогч бөгөөд Ерөнхий инженер Т.Батмөнх сонгогдсон бол дэд тэргүүнээр Эрдэнэт үйлдвэрийн Ган бөөрөнцгийн цехийн дарга А.Отгончулуун, Ерөнхий нарийн бичгийн даргаар “Сэлэнгэ” амрал, аялал жуулчлалын цогцолборын ажилтан Ш.Галиндэв нарыг томилж, Удирдах зөвлөлийг есөн хүний бүрэлдэхүүнтэй сонгосон байна. 

Тус холбоо энэ оны ажлын төлөвлөгөөндөө, тамирчдаа улс, бүс болон орон нутгийн чанартай тэмцээнүүдэд амжилттай оролцуулах, ирэх тавдугаар сард 21 аймгийн Аварга шалгаруулах тэмцээнийг Орхон аймагт зохион байгуулах, Боловсрол, шинжлэх ухааны газартай хамтран ажиллаж, сайн дурын сургагч багш нар бэлтгэх, биеийн тамирын хичээлийн хөтөлбөрт ширээний теннисний сургалтыг оруулах, мөн оны төгсгөлд Орхон аймгийн аварга шалгаруулах тэмцээн зохион байгуулах, Хүүхэд залуучуудын биеийн тамирын ордон байгуулах саналыг аймгийн удирдлагуудад уламжлах зэрэг ажлуудыг хэрэгжүүлэхээр багтаасан байна.Орхон аймгийн хэмжээнд ширээний теннисээр тогтмол хичээллэж буй 200 орчим тамирчин байгаагаас ОУХМ тамирчин нэг, спортын мастер найм, дэд мастер 10, I зэрэгтэй 16 тамирчин байна.