НИЙГМИЙН ЧИГЛЭЛИЙН ТӨСӨЛ, ХӨТӨЛБӨРҮҮДИЙГ ЭРЧИМЖҮҮЛЭХЭЭР ХУРАЛДЛАА

 “Эрдэнэт үйлдвэр” ТӨҮГ-ын Ерөнхий захирлын Хамтын ажиллагаа, нийгмийн асуудал хариуцсан орлогч Ц.Бат-Энх болон холбогдох газар, хэлтсийн мэргэжилтнүүд нийгмийн чиглэлийн төсөл, хөтөлбөрүүдийг эрчимжүүлэхээр, гүйцэтгэгч компаниудыг өчигдөр урьж, өргөн бүрэлдэхүүнтэй хуралдлаа. Цар тахлын нөхцөл байдлаас шалтгаалан хил, гаалиар ачаа эргэлт саатсан, дэлхийн зах зээл дээр бараа материалын үнэ, тээвэрлэлт, ажиллах хүчний зардал нэмэгдсэнтэй холбоотой хугацаа хоцорч яваа нийгмийн чиглэлийн бүтээн байгуулалтын төслүүдийг урагшлуулах тодорхой шийдэлд хүрсэн үр дүнтэй хуралдаан болсныг оролцогчид онцолж байна. Энэхүү өргөтгөсөн хуралдаанаар есөн багц асуудлыг хэлэлцсэн юм. Тухайлбал, Эрдэнэт үйлдвэр ажилтнуудаа орон сууцжуулах хөтөлбөрийн хүрээнд хэрэгжүүлж буй “Уурхайчин-1, 2, 3” төсөлд тулгамдсан асуудлын талаар хэлэлцэж, чиглэл өглөө. Орон сууцны “Уурхайчин-1” хороололд анх фитнесийн зориулалттай 356 м2 талбай гаргасан боловч худалдан авагч гарч ирээгүй, ажилчдад байр илүү хэрэгтэй байгааг үндэслэн зориулалтыг өөрчилж хоёр өрөө гурван байр, гурван өрөө хоёр байр, нийт таван орон сууц болгосон нь эздэдээ хүрчээ. Харин “Уурхайчин-2” хорооллын барилгын ажил гүйцэтгэж дуусах хугацааг 2023 оны гуравдугаар сарын 15 хүртэл сунгахаар болов.

Мөн Барилгын хөгжлийн төвөөр зураг төсөл болон төсвийг дахин хянуулж, дүгнэлт гарсан өдрөөр барилгын ажлыг эхлүүлэх нөхцөлийг бүрдүүлэх, бараа материалын үнэ ханшийн хэт өсөлттэй холбоотой тавьсан саналыг хэлэлцэх Ажлын хэсэг байгуулж хамтран ажиллахыг холбогдох нэгжүүдэд үүрэг болгосон бол “Уурхайчин-3” хорооллын захиалга хийгдэхээр боллоо. Түүнээс гадна Махны бөөний худалдааны төвийн зориулалтыг өөрчилж, “Тэрбум мод” үндэсний хөтөлбөрийн хүрээнд Эрдэнэт үйлдвэр хариуцан тарих 100 сая модны үр хадгалах агуулах зоорь болгон ашиглахаар шийдвэрлэв. Түүнчлэн Соёл, спортын “Эрдэнэт” цогцолбор, “Сэлэнгэ” амралт, аялал жуулчлалын цогцолборын “Ногоон хөгжлийн төв”, 320 хүүхдийн зуслангийн өвөл, зуны байр, 500 хүүхдийн багтаамжтай гал тогооны барилгын ажил, цахилгааны өргөтгөл, орон сууцны 1А хорооллын дэд бүтэц, инженерийн шугам сүлжээний ажлыг эрчимжүүлэх тодорхой шийдэлд хүрлээ.