ЭВДЭРСЭН ГАЗРЫГ НӨХӨН СЭРГЭЭХ БЭЛТГЭЛ ХАНГАЛАА

 Байгаль орчин, аялал жуулчлалын яамны Ой, ус, тусгай хамгаалалттай газрын кадастрын хэлтэс, “Эрдэнэт үйлдвэр” ТӨҮГ-ын Байгаль орчин, ногоон хөгжлийн хэлтэс, “Эх монголын байгаль” ХХК хамтран Сэлэнгэ аймгийн Ерөө сумын нутаг болох Могойт, Цамхаг, Харганат, Угтаал гол, Бугант тосгоны Их алт хэмээх газарт нийт 2000 га талбайг нөхөн сэргээхээр нисдэг камер ашиглан дээрээс нарийвчлан зураглаж бэлтгэл хангалаа. Засгийн газрын 2020-2024 оны үйл ажиллагааны хөтөлбөрт “Уул уурхайн улмаас эвдэрч, олон жил орхигдсон 8000 га талбайг нөхөн сэргээх” зорилт дэвшүүлсэн. Энэ хүрээнд Байгаль орчин, аялал жуулчлалын дэд сайд, “Эрдэнэт үйлдвэр” ТӨҮГ-ын Ерөнхий захирал нарын хамтран баталсан “Эвдэрсэн газрын нөхөн сэргээлтийн хөтөлбөр”-ийн дагуу энэхүү ажил хийгджээ. “Эрдэнэт үйлдвэр” ТӨҮГ-ын нөхөн сэргээх Сэлэнгэ аймгийн Ерөө сумын нутагт орших 2000 га талбайн байршлыг нарийвчлан тогтоох ажил 2022 оны гуравдугаар сарын 31-ний өдрөөс дөрөвдүгээр сарын 7-ны өдрийг хүртэл үргэлжилж дууслаа. Энэ онд эхний ээлжинд, эвдэрсэн 500 га газрыг нөхөн сэргээнэ, гэж “Эрдэнэт үйлдвэр” ТӨҮГ-ын Байгаль орчин, ногоон хөгжлийн хэлтсийн Ногоон хөгжил, нөхөн сэргээлтийн албаны дарга Б.Пүрэвсүрэн мэдээллээ.