ЗАЛУУ АЖИЛТНУУД ХӨГЖЛИЙН ТӨЛӨВЛӨГӨӨГӨӨ ДАДЛАГАЖУУЛАГЧ БАГШТАЙГАА ХАМТРАН БОЛОВСРУУЛНА

 “Эрдэнэт үйлдвэр” ТӨҮГ-аас  хүний нөөцөө чадавхжуулах, чадварлаг боловсон хүчин бэлтгэх, туршлагатай инженер, ажилтнуудын мэдлэг ур чадварыг залуу ажилтнуудад өвлүүлэх зорилгоор “Залгамж”, “Манлайлал, авьяас чадвар”, “Залуу ажилтныг дэмжих”, “Шинэ ажилтны дасан зохицох” гэсэн хүний нөөцийн хөгжлийн дөрвөн цогц хөтөлбөрийг хэрэгжүүлдэг. Хоёр дахь жилдээ үргэлжилж буй хөтөлбөрүүдийн нэг “Залуу ажилтныг дэмжих” хөтөлбөрт оролцогчид дадлагажуулагч багш нартайгаа уулзаж, хамтран ажиллах, хэлцэл солилцох үйл ажиллагаа боллоо. Тус үйл ажиллагаанд “Залуу ажилтныг дэмжих” хөтөлбөрийн 80 оролцогчоос гадна “Залгамж”, “Манлайлал, авьяас чадвар”-ын хөтөлбөрт хамрагдаж буй ажилтнууд оролцов. Уулзалтын эхэнд хөтөлбөр хэрэгжүүлэгч ажлын хэсгийн ахлагч, Хүний нөөцийн албаны дарга Б.Одгарьд танилцуулга, зөвлөмж мэдээлэл өгсөн бол дадлагажуулагч багш, залуу ажилтнууд өөрийгөө танилцуулж, санал бодлоо солилцлоо. Энэ үеэр залуу ажилтнууд болон дадлагажуулагч багш нар хамтран ажиллах батламжид гарын үсэг зурж, хөтөлбөрийн зорилго чиглэлийг хэрэгжүүлж ажиллахаа баталгаажуулав. Залуу ажилтнууд дадлагажуулагч багшийн өгсөн зөвлөмж, зааврын дагуу өөрийн хөгжлийн төлөвлөгөөг хамтран боловсруулж, ажиллахаа энэхүү батламжид тусгажээ.