“ISO/IEC 17020:2012 ХЯНАЛТЫН АЖИЛ ЭРХЭЛДЭГ ТӨРӨЛ БҮРИЙН БАЙГУУЛЛАГЫН АЖИЛЛАГААНД ТАВИХ ШААРДЛАГА” СЭДЭВТ ОЛОН УЛСЫН СУРГАЛТ БОЛЛОО

Хүнс, хөдөө аж ахуй, хөнгөн үйлдвэрийн яам (ХХААХҮЯ) -аас хэрэгжүүлж буй Дэлхийн банкны Олон улсын хөгжлийн ассоциацийн санхүүжилттэй “Монгол Улсад Экспортыг дэмжих” төслийн хүрээнд НҮБ-ын Аж үйлдвэрийн хөгжлийн байгууллага (ЮНИДО)-аас Монгол Улсад итгэмжлэл, тохирлын үнэлгээний чадавхийг сайжруулахад техникийн туслалцаа үзүүлж байна. 

ХХААХҮЯ болон ЮНИДО нь Монгол Улсын Үндэсний итгэмжлэлийн төвтэй хамтран “ISO/IEC 17020:2012 Хяналтын ажил эрхэлдэг төрөл бүрийн байгууллагын ажиллагаанд тавих шаардлага” сэдвээр олон улсын онол-дадлага хосолсон сургалтыг тохирлын үнэлгээний байгууллагууд, итгэмжлэлийн үнэлгээний ажилтнууд, шинжээчдэд 2023 оны 1-р сарын 11-12, 16-18-ны өдрүүдэд зохион байгууллаа.

Энэхүү сургалт нь ISO/IEC 17020 стандарт болон энэхүү стандартын шаардлагыг хяналтын байгууллагын янз бүрийн орчинд хэрэглэхийг ойлгоход нь туслах зорилготой юм. Оролцогчид ISO/IEC 17020 стандартын бүх заалтуудтай танилцахын зэрэгцээ уг стандартын шаардлагын дагуу хяналтын байгууллагуудыг итгэмжлэх үйл явц болон үнэлгээг хэрхэн хийхэд суралцаж шударга байдал, нөөц, үйл явц, менежментийн тогтолцоо, хараат бус байдлын шаардлагыг хангасан стандартыг амжилттай үнэлэх чадвартай болж, хяналт шалгалтын үйлчилгээг хүргэх үр дүнтэй үйл явцыг хэрэгжүүлэх дадлыг эзэмшив. Тохирлын үнэлгээний байгууллагуудын хувьд шударга, хараат бус байдал, нөөц, үйл явц, удирдлагын тогтолцооны шаардлагад нийцүүлэн стандартыг амжилттай хэрэгжүүлэх чадвартай болох давуу талтай сургалт болов. 

Сургалт нь интерактив бөгөөд бие даасан болон багийн ажиллагаа хэлбэрээр явагдана. Илтгэл, дасгал, жишээ судалгаа, практик сургалтаас бүрдэв.

Сургалтыг ЮНИДО-ын Итгэмжлэлийн ахлах эксперт, ISO 17025, 15189, 17020, 17021, 17024, 17065, 17043 стандартуудын ахлах шинжээч ноён Мухамед Саад удирдаж байна. Тэрбээр Олон улсын лаборатори итгэмжлэлийн хамтын ажиллагааны байгууллагын (ILAC) Итгэмжлэлийн хороо, Хяналтын хороо болон Олон улсын итгэмжлэлийн форум (IAF)-ын Техникийн хорооны гишүүн бөгөөд Арабын итгэмжлэлийн хамтын ажиллагааны байгууллагын ISO 17011 стандартын ижил түвшний үнэлгээний мэргэжилтэн юм.