НҮБ-ЫН ХҮНС, ХӨДӨӨ АЖ АХУЙН БАЙГУУЛЛАГЫН ТҮНШҮҮДИЙН УУЛЗАЛТ БОЛЛОО

Хүнс, хөдөө аж ахуй, хөнгөн үйлдвэрийн сайд Х.Болорчулуун НҮБ-ын Хүнс, хөдөө аж ахуйн байгууллагын түншүүдийн уулзалтад оролцлоо. Энэхүү уулзалтаар “Мал аж ахуйн үйлдвэрлэл”, “Газар тариалангийн үйлдвэрлэл ба бодлого”, “Нэгдсэн, нотолгоонд суурилсан хариуцлагатай байгалийн менежмент” төсөл, НҮБ-ын Хүнс, хөдөө аж ахуйн байгууллагын онцлох амжилтууд, тус байгууллагаас 2023-2027 онд Монгол Улсад хэрэгжүүлэх хамтын ажиллагааны хөтөлбөрийг танилцуулав. 

Хүнс, хөдөө аж ахуй, хөнгөн үйлдвэрийн сайд Х.Болорчулуун: 
“2023 оны 01 дүгээр сарын 18-22-ны өдрүүдэд ХБНГУ-д зохион байгуулагдсан Ногоон долоо хоног, Дэлхийн Хөдөө аж ахуйн сайд нарын чуулга уулзалтад миний бие оролцоод ирлээ. Энэхүү чуулга уулзалт нь “Хувьсан өөрчлөгдөж буй хүнсний тогтолцоо: Олон талын хямралд Дэлхий даяар өгөх хариу арга хэмжээ” гэсэн сэдвийн дор зохион байгуулагдсан. Дэлхийн өмнөд бүс нутаг, Африкийн орнууд ялангуяа бордоо нийлүүлэлт, хүнсний хангамж, аюулгүй байдлын нөхцөл хүнд байгаа талаар ярьж байсан. Цаг уурын өөрчлөлтийн сөрөг нөлөөлөл, Ковид-19 цар тахлын хязгаарлалт, улс төр, геополитикийн зөрчилдөөн зэрэг нь зөвхөн ганц хоёр улсын биш, дэлхий олон олон улс орныг хамарсан томоохон сорилт болоод байна.

Монгол Улс мөн ялгаагүй цаг уурын өөрчлөлтөд хамгийн их нэрвэгдэж байгаа улс орны нэг яах аргагүй мөн билээ. Ковид-19 цар тахлын үр дагавраас шалтгаалан манай өмнөд хилийн боомтууд сүүлийн 3 жил хязгаарлагдмал нөхцөл байдалд ажиллаж, тээвэр ложистикийн хүндрэлүүд нүүрэлсэн үе байлаа. Мөн хойд хөршийн улс төрийн зөрчил, дайны нөхцөл байдал нь олон улсын хүнс, үр тариа, бордооны нийлүүлэлт, худалдаа, хангамж, тээвэр ложистикийн салбарт сөрөг нөлөөлөл үзүүлсээр байна. 

Монгол Улс эдгээр сорилтуудыг даван туулах, хүн амын эрүүл мэнд, зөв хооллолт, нэн шаардлагатай амин дэмийн хүртээмжийг нэмэгдүүлэх, хүнсний хангамж, аюулгүй байдлыг бие даан хангах чиглэлээр УИХ, Засгийн газрын түвшинд тодорхой санаачилга, бодлогын бичиг баримт, зорилтуудыг баталж, хэрэгжүүлэхээр ажиллаж байгааг Та бүхэн мэдэж байгаа. Үүний нэг том жишээ бол Хүнсний хангамж, аюулгүй байдлын тухай УИХ-ын 2022 оны 36 дугаар тогтоолын хүрээнд бид хүнсний ногооны 73 хувийг хангах зорилго тавин ажиллаж байна. Ирэх 4 жилийн хугацаанд 1.7 их наяд төгрөг Хүнс, хөдөө аж ахуйн салбарт зориулагдахаар байгаа.   
Монгол Улс дотоосоо бүрэн хангах боломжтой, импортын зарим нэр төрлийн хүнсний бүтээгдэхүүнийг 100 хувь орлох боломж бидэнд байна. Нэг жишээ дурдахад, Монгол Улс хүнсний хэрэгцээнд ашиглаж болох томоохон давсны ордуудтай, гэтэл өнөөдрийг хүртэл хүнсний давсныхаа 98 хувийг бид импортоор авч байна. Энэ байдлыг таслан зогсоох, тодорхой арга хэмжээ авах цаг нь ирсэн.
2023 онд Хүнс, хөдөө аж ахуй, хөнгөн үйлдвэрийн яамны зүгээс дунд болон урт хугацааны тодорхой ажлууд төлөвлөн ажиллаж байна. Үүнд:
•    2022 оны 11 дүгээр сарын 23-ны өдрийн Засгийн газрын өргөтгөсөн хуралдаанаар Мал эмнэлгийн дэглэм бүхий хорио цээрийн бүсийг Монгол Улсын баруун, хойд болон зүүн аймгуудад байгуулах тогтоолыг батлуулан, малын гоц халдварт өвчнөөс ангид вакцинжуулалтын дэглэм бүхий бүсийг Дэлхийн мал, амьтны эрүүл мэндийн байгууллагаас тавигддаг шаардлага, стандартад нийцүүлэн байгуулах ажлыг зохион байгуулна;
•    Мал, амьтны эрүүл мэндийг хамгаалах, хянахад малыг ээмэгжүүлэн бүртгэлжүүлэх, мөшгөх тогтолцоог бий болгоход чухал ач холбогдолтой. Хүнс, хөдөө аж ахуй, хөнгөн үйлдвэрийн яам 2023 онд багтаан Монголын үхэр сүргийг бүрэн ээмэгжүүлэн бүртгэлжүүлэх ажлыг зохион байгуулна;
•    Хүнсний хангамж, аюулгүй байдлыг бие даан хангах ажлын хүрээд зарим нэр төрлийн хүнсний бараа бүтээгдэхүүнд Дэлхийн худалдааны байгууллагаас заасан хязгаарлалтаас давахгүйгээр 20 хувь хүртэлх хувийн импортын татвар оногдуулах арга хэмжээ авна. Үүнийг бид тодорхой үе шат, дараалалтай хэрэгжүүлэх болно. 
     Иймд Хүнс, хөдөө аж ахуйн байгууллагын түншүүдийн өнөөдрийн уулзалтад оролцож буй Та бүхний анхааралд Хүнс, хөдөө аж ахуй, хөнгөн үйлдвэрийн яамны зүгээс хэрэгжүүлж буй эдгээр төсөл, хөтөлбөр, санаачилгыг цаашид дэмжин хамтран ажиллахыг уриалж байна. Бид хамтдаа байж өнөөгийн тулгараад буй сорилтуудыг амжилттай даван туулна гэдэгт итгэлтэй байна.” гэсэн юм.