ЭМЯ: Дархан-Уул аймагт тусгаарласан иргэний шинжилгээний хариу сөрөг гарсан

ЭМЯ-ны Нийгмийн эрүүл мэндийн газрын дарга Д.Нарангэрэл “Дархан-Уул аймагт тусгаарлагдсан болон БНСУ-аас ирсэн хоёр иргэний шинжилгээний хариу сөрөг гарч шинэ коронавирусийн халдваргүй болох нь тогтоогдсон. Манай улсад хоёрдугаар сарын 8-нд хувийн хамгаалах хэрэгсэл ирнэ" гэв.

ДЭМБ-ын мэргэжилтэн О.Ариунтуяа: Өглөө 08:00 цагийн байдлаар шинэ коронавирусийн халдварын тоо өмнөх өдрөөсөө 3,857 тохиолдлоор нэмэгдсэн. Бельгид анхны тохиолдол бүртгэгдээд байна. Анх Хятадаас гадна Тайландад анхны тохиолдол бүртгэгдсэнээс хойш одоогийн байдлаар 24 улсад бүртгэгдсэн ч хилийн хяналтыг сайжруулснаар халдварыг гартаа авч дэлхийн хэмжээний дэгдэлт болохоос сэргийлж чадсан. Нийт тохиолдлын 80 хувь нь хөнгөн явцтай байна” гэлээ.

ХӨСҮТ-ийн ерөнхий захирал Д.Нямхүү: Хоёрдугаар сарын 4-нд Дархан-Уул аймагт нэг, ХӨСҮТ-д хоёр хүн тусгаарлагдсан. Шинжилгээний хариу гарсан, коронавирусийн халдвар илрээгүй. Орхон аймагт тусгаарлагдсан сэжигтэй тохиолдлын шинжилгээний сорьц өнөөдөр ирнэ, маргааш шинжилгээний хариу гарна.

Хоёрдугаар сарын 5-ны байдлаар 7 сэжигтэй тохиолдол тусгаарлагдан, эмчийн хяналтад тандалт судалгааг хийж байна. Иргэд 80086829 утсаар 24 цагийн турш мэдээлэл авах боломжтой. Ойрын өдрүүдэд шуурхай утас руу залгах хүний тоо буурч байгаагаас харахад иргэд коронавирусийн халдварын талаар ойлголттой болж байгаа бололтой” гэлээ.