УИХ-ын дарга Г.Занданшатар олон улсын шатрын "ФИДЕ" холбооны Ерөнхийлөгч Дворкович Аркадий Владимировичтэй уулзлаа

Монгол Улсын Их Хурлын дарга Г.Занданшатар ОХУ-д хийсэн албан ёсны айлчлалынхаа үеэр Монгол Улсын шатрын холбооны хүндэт ерөнхийлөгчийн хувиар олон улсын шатрын "ФИДЕ" холбооны ерөнхийлөгч Дворкович Аркадий Владимировичтэй уулзлаа.

"ФИДЕ" нь Дэлхийн үндэсний шатрын холбоодыг нэгтгэн 1924 оны 7 дугаар сарын 20-нд Парис хотноо байгуулагдсан юм. Тус холбоо нь нэр дэвшигчдийн болон  дэлхийн аварга шалгаруулах тэмцээн,  олон улсын  тэмцээн,  шатрын олимпиадыг зохион байгуулахаас гадна спортын цол олгох, албан ёсны үнэлгээ, эрэмбийг тооцох зэрэг шатрын спортыг дэлхий нийтэд сурталчлах, түгээн дэлгэрүүлэхэд  чухал үүрэг хүлээж ажилладаг юм.   

Уулзалтын үеэр УИХ-ын  дарга Г.Занданшатар,  монгол  хүүхдүүд   дэлхийн болоод олон улсын чанартай тэмцээнүүдэд аваргалж, тогтмол амжилт үзүүлж буйг онцоллоо. Мөн тэрбээр, сайн багш дасгалжуулагчдыг Монголд урьж ажиллуулах хүсэлтэй байгаагаа илэрхийлэв.

"ФИДЕ" холбооны ерөнхийлөгч Дворкович Аркадий Владимирович, УИХ-ын даргын саналыг дэмжиж,  шатрын чадварлаг багш дасгалжуулагчийг ажиллуулж, шатрын багш нарыг тусгайлан бэлтгэдэг хөтөлбөрийг Монгол Улсад хэрэгжүүлэх боломжтой гэв. “Алтай дамнасан  тогтвортой байдлын хэлэлцээр” чуулга уулзалтыг Монгол Улсад  амжилттай зохион байгуулсан. Дараагийн удаа Алтай дамнасан улс орнуудын шатрын тэмцээн зохион байгуулах тухай УИХ-ын даргын саналыг "ФИДЕ" холбооны Ерөнхийлөгч  "маш сонирхолтой санаа" хэмээгээд  холбооны зүгээс  ажил хэрэг болгох талаар ярилцжээ.

Мөн "ФИДЕ" холбооноос ирэх наймдугаар сард Казакстан улсад болох дунд сургуулийн сурагчдын  шатрын тэмцээнд монгол хүүхдүүдээ  оролцуулахыг урьсан. 

Харин ирэх жилийн тэмцээнийг Монгол Улсад зохион байгуулж, улмаар 2028 онд болох Дэлхийн шатрын аварга шалгаруулах шатрын тэмцээнийг эх орондоо зохион байгуулах хүсэлтэй байгаагаа УИХ-ын дарга Г.Занданшатар илэрхийллээ хэмээн УИХ-ын Хэвлэл мэдээлэл, олон нийттэй харилцах газраас мэдээлэв