УИХ-ын Ерөнхий нарийн бичгийн дарга Л.Өлзийсайхан Японы парламентын Төлөөлөгчдийн танхимын Ерөнхий нарийн бичгийн дарга Окада Норихарү-тай уулзлаа

Монгол Улсын Их Хурлын Ерөнхий нарийн бичгийн дарга Л.Өлзийсайхан Үндэсний Диет буюу парламентын үйл ажиллагаа, хуулийн төсөл боловсруулах, батлах болон эрх зүйн дүн шинжилгээ, парламентын судалгаа, олон нийтийн боловсролыг дээшлүүлэх чиглэлээр туршлага судлахаар Япон Улсад ажиллаж байна. Үндсэн хуульд оруулсан өөрчлөлтийн дагуу Монгол Улсын Их Хурлын бүрэлдэхүүн өргөжиж, сонгуулийн холимог тогтолцоогоор бүрдэх 126 гишүүнтэй ажиллах болсонтой холбогдуулан олон гишүүн бүхий парламентуудын үйл ажиллагааны онцлог, туршлага, парламентат ёсны хөгжлийг хангах ажлын шинэ чиг хандлагыг судлах, нэвтрүүлэхэд Тамгын газар анхаарал хандуулж байна. Ерөнхий нарийн бичгийн дарга Л.Өлзийсайхан өнөөдөр тус улсын парламентын Төлөөлөгчдийн танхимын Ерөнхий нарийн бичгийн дарга Окада Норихарү-тай уулзлаа. Ноён Окада Норихарү 2019 оноос тус албан ажлыг эрхэлж байгаа бөгөөд өмнө нь Төлөөлөгчдийн танхимын Тамгын газарт судлаач, ажилтнаас эхлэн хэлтэс, газрын дэд дарга, даргын алба хашиж байсан юм.

Уулзалтын эхэнд Ерөнхий нарийн бичгийн дарга Л.Өлзийсайхан хоёр улсын парламент хоорондын харилцаа зохих түвшинд хүрч хөгжиж буйг онцлоод, Японы ард түмний туулсан зам, хөгжлийн загвар, туршлага Монгол Улсын хувьд сайн жишиг, үлгэрлэл болж ирснийг тэмдэглэв.

Тэрбээр, Монгол Улсын Их Хурлын дарга Г.Занданшатарын санаачилгаар “Япон лугаа адил хөгжье” үзэл санааг дэвшүүлэн, тус улсын хөгжлийн загвар, туршлагаас суралцах, сайн жишгийг нутагшуулахад ихээхэн анхаарал хандуулж буйг дурдаад, Монголын парламентын өмнө тулгарч буй сорилтууд болон бүтэц, бүрэлдэхүүний шинэчлэлтийн талаар танилцуулав.

Түүнчлэн, Улсын Их Хурлын Тамгын газраас Швейцарийн хөгжлийн агентлагтай хамтран хэрэгжүүлж буй "Монгол Улсад парламентын ардчиллыг бэхжүүлэх нь” төсөл, “Парламентын боловсрол” хөтөлбөр, парламентат ёсны тухай олон нийтийн ойлголт, мэдлэгийг дээшлүүлэх талаар явуулж буй үйл ажиллагааг танилцуулж, Японы Парламентын музей, Парламентын боловсрол хөтөлбөр (Parliamentary StudyProgram)-тэй танилцах завшаан тохиолдож байгаад баяртай байгаагаа илэрхийллээ.

Төлөөлөгчдийн танхимын Ерөнхий нарийн бичгийн дарга Окада Норихарү уулзалтад сэтгэл ханамжтай байгаагаа тэмдэглэж, Монгол, Японы парламент болон төрийн өндөр хэмжээний харилцан айлчлалууд, тэдгээрийн ач холбогдол, үр дүнгийн талаар дурдаад, тус танхим болон Тамгын газрын талаар танилцуулав. Японы парламентын Төлөөлөгчдийн танхим 465 гишүүнтэй бөгөөд гишүүд дөрвөн жилийн хугацаатайгаар сонгогдож ажилладаг байна.  Ерөнхий нарийн бичгийн дарга Окада Норихарү Төлөөлөгчдийн танхимын бүтэц, чуулганы хуралдааны дэг, зарчим, бүрэн эрхийг танилцуулахын зэрэгцээ Тамгын газрын удирдлага, зохион байгуулалт, газар, хэлтсийн чиг үүрэг зэргийг тодорхой тайлбарлав.

Цаашид хоёр улсын Парламентын Тамгын газар хоорондын хамтын ажиллагааг хөгжүүлэх өргөн боломж байгааг Ерөнхий нарийн бичгийн дарга нар харилцан тэмдэглээд, парламентат ёсны хөгжил, Тамгын газруудын туршлага, ур чадварыг харилцан солилцох, мэргэжилтнүүдийн дадлагажуулах, тус тусын болон бусад улсын туршлагыг судлахад хамтран ажиллахаар ярилцлаа. Ерөнхий нарийн бичгийн дарга Л.Өлзийсайхан ноён Окада Норихарүг тааламжтай цагтаа Монгол Улсын Их Хурлын Тамгын газарт зочлохыг урьж, цаашид хамтран ажиллах санамж бичиг байгуулж ажиллах саналтай байгаагаа илэрхийллээ.

Ерөнхий нарийн бичгийн дарга Л.Өлзийсайхан тэргүүтэй Улсын Их Хурлын Тамгын газрын төлөөлөгчид мөн тус улсын Парламентын ордон болон музейг үзэж сонирхон, Төлөөлөгчдийн танхимын Хууль зүйн газар болон Олон улсын хамтын ажиллагааны газрын үйл ажиллагаатай танилцлаа.

Парламентын музейн дарга Кикүта Юкио Японы парламентат ёсны хөгжлийг харуулсан музейнхээ талаар дэлгэрэнгүй танилцуулж, тус музей парламент болон олон нийтийн харилцааны томоохон гүүр болдгийг онцлон тэмдэглэсэн юм гэж Улсын Их Хурлын Хэвлэл мэдээлэл, олон нийттэй харилцах газраас мэдээллээ.