ТУРКИЙН ИСТАНБУЛД 177 ХҮНТЭЙ “BOEING 737” ОНГОЦ ОСОЛДЖЭЭ

Истанбулын нисэх онгоцны буудалд өчигдөр орон нутгийн “Pegasus Airlines” компанийн “Boeing 737” нисэх онгоц маш хүчтэй газардахдаа нислэгийн зурвасаас хэтрэн, их биеэрээ гулсан гурван хэсэгт хуваагдсан аж.

Тус онгоцонд зорчигчид, нислэгийн багийн зургаан гишүүн нийт 177 хүн  байсан ба ослын улмаас нэг хүн амиа алдаж, 150 гаруй хүн гэмтэж, бэртжээ. Онгоц газардах үед хүчтэй аадар бороо орж байсан бөгөөд ослын дараа нисэх буудлын үйл ажиллагааг түр зогсоож, нислэгүүдийг хойшлуулжээ.

Зорчигчдын ихэнх нь турк хүмүүс байсан ба 20 орчим гадаадын иргэн байсан талаар эх сурвалжууд мэдээлсэн байна.

Цахим сүлжээнд байршуулсан бичлэгээс харахад онгоц осолдсоны дараа гал гарч байсан ч гал сөнөөгчид унтраажээ. 20 жилийн өмнөөс үйл ажиллагаагаа эхлүүлсэн “Pegasus Airlines” компани нь нийт 83 онгоцтойгоос 47 нь “Boeing”, 36 нь “Airbus” компанийн онгоц гэнэ.

2018 оны нэгдүгээр сард тус компанийн ижил загварын онгоц дээрхтэй төстэй байдлаар осолдсон бөгөөд нэг ч хүний амь эрсдээгүй ажээ.