“VERSACE”, “MICHAEL KORS БА JIMMY CHOO” 100 САЯ АМ.ДОЛЛАРЫН ХОХИРОЛ АМСАЖ БОЛЗОШГҮЙ БАЙНА

БНХАУ-д “2019-nCoV” вирусээр үүсгэгдсэн уушгины хатгалгаа өвчин дэгдсэний улмаас АНУ-д төвтэй "Versace", "Michael Kors ба Jimmy Choo" загварын брэндүүдийн эзэн “Capri Holdings”  компани 100 сая ам.долларын хохирол амсаж магадгүй байна.

Хоёрдугаар сарын 5-ны байдлаар компани БНХАУ дахь 225 дэлгүүрээс 150-г нь хаахад хүрсэн бол үлдсэн дэлгүүрүүдийн хувьд худалдан авагчдын тоо эрс буурсан байна.

“2019-nCoV” вирусээр үүсгэгдсэн уушгины хатгалгаа өвчин Ухань хотод дэгдэж эхэлсэн тухай БНХАУ-ын эрх баригчид 12 дугаар сарын сүүлчээр мэдэгдсэн юм. БНХАУ-аас гадна энэ өвчний тохиолдол өөр 23 улсад бүртгэгдээд байгаа юм. Үүнтэй холбоотойгоор ДЭМБ олон улсын хэмжээнд онцгой байдал зарласан юм. Одоогоор энэ өвчнөөр халдварласан хүний тоо 24.3 мянга даваад байгаа бол 492 хүн энэ өвчний улмаас нас барж, 900 хүн эдгэрсэн байна.