ҮНДЭСНИЙ БОЛОН ОРОН НУТГИЙН МАЛ ЭМНЭЛГИЙН ЛАБОРАТОРИУДЫГ ЧАДАВХЖУУЛНА

Монгол Улсын Засгийн газраас Дэлхийн банкны санхүүжилттэй Мал аж ахуйн эдийн засгийн эргэлтийг нэмэгдүүлэх төслийг хэрэгжүүлж байгаа ба тус төслийн малын эрүүл мэндийн бүрэлдэхүүн хэсгийг хэрэгжүүлэхээр ХХААХҮЯ, НҮБ-ын ХХААБ хооронд “Техникийн туслалцаа үзүүлэх гэрээ” байгуулан ажиллаж байна.

Энэхүү төслийн хүрээнд Улсын мал эмнэлэгийн ариун цэврийн төв лаборатори, Ховд, Хэнтий, Өвөрхангай аймгийн Мал эмнэлгийн лабораторид оношилгооны тоног төхөөрөмж нийлүүлэхээс дээрх 3 аймгийн МЭЛ-ийн тоног төхөөрөмжийг хүлээлгэн өгөөд байна. Мал эмнэлгийн лабораторид орчин үеийн стандартад нийцсэн нарийвчлал сайтай, өндөр хүчин чадалтай багаж, тоног төхөөрөмжийг суурилуулан ашиглахад барилга байгууламжийн хийц бүтээц, түүний цахилгаан, сантехник, агааржуулалтын системд өндөр шаардлага тавигддаг. Тиймээс барилга, байгууламжийг засварлах ажлыг мөн хэрэгжүүлэх юм.

Одоогоор Ховд, Хэнтий, Өвөрхангай аймгийн Мал эмнэлгийн лабораторийн барилгын засварын ажлын гүйцэтгэгчийг сонгон шалгаруулаад байгаа юм. УМЭАЦТЛ-ийн засварын ажлын гүйцэтгэгчийг сонгох ажлыг эхлүүлэхийн тулд төсвийн талаар хэлэлцэж шийдвэрлэх шаардлагатай учир ХХААХҮЯ-ны Төрийн нарийн бичгийн дарга Т.Жамбалцэрэн, НҮБ-ын ХХААБ-ын Суурин төлөөлөгч Винод Ахужа, МЭЕГ-ын дарга А.Нарантуяа нар тус лаборатори дээр ажиллаж нөхцөл байдалтай танилцан лабораторийн удирдлагуудтай уулзаж санал солилцлоо.

Дээрх ажлын үр дүнд Улсын мал эмнэлэг, ариун цэврийн төв лаборатори болон Ховд, Хэнтий, Өвөрхангай аймгийн Мал эмнэлгийн лабораториуд малын халдварт өвчнийг оношлох, хүнсний аюулгүй байдлыг баталгаажуулах шинжилгээг олон улсад хүлээн зөвшөөрөгдсөн аргачлалын дагуу хийж гүйцэтгэх боломж бүрдэх юм.