ЦАГААН БУДААНЫ ТАРИАЛАЛТЫГ НЭМЭГДҮҮЛЭХ ЧИГЛЭЛЭЭР ВЬЕТНАМ УЛСТАЙ ХАМТРАН АЖИЛЛАНА

Хүнс, хөдөө аж ахуй, хөнгөн үйлдвэрийн яамны Төрийн нарийн бичгийн дарга Т.Жамбалцэрэн Бүгд Найрамдах Социалист Вьетнам Улсын Аж үйлдвэр, худалдааны яамны Ази-Африкийн зах зээлийн газрын Ерөнхий захирлын орлогч ноён До Куок Хан тэргүүтэй төлөөлөгчдийг хүлээн авч уулзлаа. Уулзалтаар хоёр улсын хооронд байгуулах “Цагаан будаа худалдах, худалдан авах тухай харилцан ойлголцлын санамж бичиг”-ийн талаар ярилцаж, санал солилцов.

"Дэлхийн цагаан будааны зах зээлийн 40 хувийг дангаараа хангадаг, томоохон экспортлогч Энэтхэг улс цар тахлын улмаас цагаан будааны экспортод хориг тавьснаар дэлхийн цагаан будааны эрэлт, нийлүүлэлт нь олон талын сорилттой тулгарч байна. Жил бүр 9.5 сая тонн цагаан будаа экспортлох хүчин чадалтай Вьетнам улс уламжлалт найрсаг харилцаатай улс орнуудтай цагаан будаа сааталгүй нийлүүлэх чиглэлээр хамтран ажиллаж ирсэн. Эдгээр улсын тоонд Монгол Улс зүй ёсоор багтдаг. Иймээс дээрх Харилцан ойлголцлын санамж бичгийг энэ оны сүүлээр Монгол Улсын Ерөнхийлөгч манай улсад хийх Төрийн айлчлалын үеэр яамд хоорондын түвшинд байгуулах саналтай байна" хэмээн Ерөнхий захирлын орлогч ноён До Куок Хан байр сууриа илэрхийлэв.

Худалдаа, эдийн засаг, шинжлэх ухаан, технологийн хамтын ажиллагааны Монгол Улс, БНСВУ-ын Засгийн газар хоорондын комиссын 13 дугаар хуралдаанаар хэлэлцэж тохиролцсоны дагуу, мөн хоёр орны худалдаа, бараа эргэлтийг нэмэгдүүлж 100 сая ам.доллар хүргэх зорилттой уялдуулан энэхүү Харилцан ойлголцлын санамж бичгийг байгуулахад ХХААХҮЯ бүрэн дэмжиж байгаагаа Төрийн нарийн бичгийн дарга Т.Жамбалцэрэн илэрхийлээд, зөвхөн цагаан будааны импортоос гадна Монгол Улс дотооддоо цагаан будаа тариалалтыг амжилттай хэрэгжүүлэхэд хамтран ажиллах, хоёр улс хооронд хийж болох бусад бараа бүтээгдэхүүний худалдааг идэвхжүүлэх нь мөн чухал ач холбогдолтой болохыг онцлон тэмдэглэсэн юм. Ингээд хоёр тал Харилцан ойлголцох санамж бичгийн төслийг энэ оны 9 дүгээр сар гэхэд эцэслэн тохиролцож, Төрийн тэргүүний БНСВУ-д хийх айлчлалын үеэр байгуулахаар харилцан тохиролцов.