ЭХ ОРОНЧ ҮЗЛИЙН ТАЛААРХ СЭТГЭГДЛЭЭ УРАЛДУУЛЛАА

“Орчин үе-Эх оронч үзэл” сэдэвт эсээ бичлэгийн уралдааны дүн гарлаа. “Монгол цэргийн нэгдсэн холбоо”, “Отгонтэнгэр” их сургууль хамтран төрийн цэргийн болон хууль сахиулах байгууллагуудын залуу офицер, ахлагч нарын дунд зохион байгуулсан “Орчин үе – Эх оронч үзэл” сэдэвт эсээ бичлэгийн уралдааны шагнал гардуулах ёслол Хил хамгаалах ерөнхий газарт боллоо.

Арга хэмжээнд Хил хамгаалах ерөнхий газрын дарга, хошууч генерал Х.Лхагвасүрэн, МЦНХ-ны Ерөнхий нарийн бичгийн дарга, дэслэгч генерал Ц.Тогоо, Ажлын албаны дарга, хурандаа Ж.Ванчинсүрэн, Отгонтэнгэр их сургуулийн Сэтгүүл зүй, олон улсын харилцааны тэнхимийн эрхлэгч Г.Золзаяа, мөн сургуулийн багш, Монгол Улсын Гавьяат багш, МЦНХ-ны Удирдах зөвлөлийн гишүүн доктор Б.Галиндэв нар болон ХХЕГ-ын алба хаагчид, МЦНХ-ны ажлын албаны төлөөлөл, “Отгонтэнгэр” их сургуулийн оюутан залуус, оролцов.

МЦНХ-ны Ерөнхий нарийн бичгийн дарга дэслэгч генерал Ц.Тогоо арга хэмжээг нээж хэлсэн үгэндээ тус холбооноос өнгөрсөн хугацаанд зохион байгуулсан нийт ажлын 25,9 хувь нь иргэдэд эх оронч үзэл, үндэсний бахархлыг төлөвшүүлэхэд, 25,0 хувь нь Монгол Улсын тусгаар тогтнол, аюулгүй байдлыг бэхжүүлэх, Монголын төрт ёсны эрхэм үнэт зүйлсийг хамгаалан бэхжүүлэхэд чиглэгдсэн болохыг онцлоод, энэхүү эсээ бичлэгийн уралдаан ч энэ хүрээнд хийгдсэн ажлуудын нэг болохыг дурдаж, тус уралдаанд оролцсон 260 гаруй оролцогчдод талархал дэвшүүллээ.

Эсээ бичлэгийн уралдаанд төрийн цэргийн болон хууль сахиулах байгууллагуудад алба хааж буй 260 гаруй залуу офицер, ахлагч нарын эсээ ирснээс дараах оролцогчид шагналт байранд шалгарлаа: ТЭРГҮҮН БАЙР-ыг ЗХЖШ-ын Сургалт бэлтгэлийн газрын мэргэжилтэн, хошууч Б.Балжинням ДЭД БАЙР-ыг Цагдаагийн ерөнхий газрын Нийтийн хэв журам хамгаалах, олон нийтийн аюулгүй байдлыг хангах албаны шүүх, шүүгчийн аюулгүй байдлыг хангах хэлтсийн ажилтан, цагдаагийн дэд ахлагч М.Март, ГУТГААР БАЙР-ыг Зэвсэгт хүчний 345 дугаар нэгтгэлийн дотрын их эмч Б.Оюундэлгэр нар эзэллээ. Харин шагналт байранд Шүүхийн шийдвэр гүйцэтгэх ерөнхий газрын харьяа 445 дугаар нээлттэй хорих ангийн ээлжийн дарга, дэслэгч У.Ивээлтхүү, Цагдаагийн ерөнхий газрын Гэрч, хохирогчийг хамгаалах хэлтсийн эрүүгийн мөрдөгч, цагдаагийн ахмад М.Оюунтуяа, Дорнод аймгийн Онцгой байдлын газрын Хэрлэн сум дахь Гал түймэр унтраах, аврах 52 дугаар ангийн салааны захирагчийн туслах, ахлагч З.Алтангадас нар хүртлээ.