“Шинэ хоршоо-Чинээлэг малчин” хөтөлбөрийг хэрэгжүүлнэ

МАН-ын Ерөнхий Нарийн Бичгийн дарга, Монгол Улсын сайд, ЗГХЭГ-ын дарга Д.Амарбаясгалан өчигдөр (2024.04.10) Уламжлалт мал аж ахуйд тулгамдаж буй уур амьсгалын өөрчлөлтөөс шалтгаалсан сөрөг нөлөөллийг бууруулах тухай хуулийн төслийг УИХ-ын дарга Г.Занданшатарт өргөн барьсан юм. Энэхүү хуулийг УИХ энэ долоо хоногт яаралтай горимоор хэлэлцэн батлахаар төлөвлөжээ.
Хууль батлагдсаны дараа Засгийн газраас хөтөлбөр гаргаж мал аж ахуйг хөгжүүлэх, малчид руу чиглэсэн томоохон дэмжлэгийг эхлүүлэх гэж байна. Энэ талаарх илүү дэлгэрэнгүй мэдээлэл солилцохоор  “Шинэ хоршоо-Чинээлэг малчин” хэлэлцүүлэг өнөөдөр Удирдлагын академид боллоо. Улсын хэмжээнд нийт 1600 гаруй хоршоо эрхлэгчид байгаа бөгөөд тэднээс 127 нь өнөөдрийн хэлэлцүүлэгт төлөөлж оролцож байна. 
МАН-ын Ерөнхий Нарийн Бичгийн дарга, Монгол Улсын сайд, ЗГХЭГ-ын дарга Д.Амарбаясгалан УИХ-д өргөн барьсан Уламжлалт мал аж ахуйд тулгамдаж буй уур амьсгалын өөрчлөлтөөс шалтгаалсан сөрөг нөлөөллийг бууруулах тухай хуулийн төсөл батлагдсанаар ямар үр дүн гарах, Засгийн газраас хэрэгжүүлэх “Шинэ хоршоо-Чинээлэг малчин”  хөтөлбөрийн талаар хэлэлцүүлэгт оролцогчдод танилцуулав.
Манай орны нийт газар нутгийн 72.1 хувийг мал аж ахуйн салбарт ашиглаж, ДНБ-ийн 10.5 хувийг энэ салбар үйлдвэрлэж, нийт ажиллах хүчний 21.6 хувь нь тус салбарт ажиллаж байна.
Гэвч сүүлийн жилүүдэд цаг агаарын хүндрэлтэй нөхцөл ойр ойрхон давтагдаж, хуурайшилт нэмэгдэн, бэлчээр доройтож, зудад малаа алдсан малчид хот суурин газар бараадаж, энэ хэрээр ажилгүйдэл, хотын түгжрэл нэмэгдсээр байгаа юм. Иймд малчдын амьжиргаанд нөлөөлж буй дээрх хүчин зүйлийг харгалзан Засгийн газар хуулийн төсөл санаачилж, “Шинэ хоршоо-Чинээлэг малчин” хөтөлбөр хэрэгжүүлэх гэж байгаа юм.
Малчид чинээлэг, дундаж давхарга болох ёстой гэж МАН-ын Ерөнхий Нарийн Бичгийн дарга, Монгол Улсын сайд, ЗГХЭГ-ын дарга Д.Амарбаясгалан онцолж байлаа. Гэхдээ төр оролцох хэмжээндээ оролцоод, бусдаар малчид өөрсдөө хоршиж хөгжих боломж, зах зээлийг нээж өгч байгаагаараа “Шинэ хоршоо-Чинээлэг малчин” хөтөлбөрийн зорилго оршиж байгаа аж. 

Хөтөлбөр хэрэгжсэнээр малчид сайн дураар нэгдэн хоршоо байгуулж, хоршооны гишүүн айл хөрөнгө оруулалт хэлбэрээр 50 сая хүртэлх төгрөгийн зээлийг Зээлийн батлан даалтын сангийн баталгаагаар авч болно. Зээлийг ХААН банк, Төрийн банкнаас авна, эрсдэл гарахаас сэргийлж хувийн даатгалын компаниуд ажиллах юм байна.  Хөтөлбөр хэрэгжсэнээр мал аж ахуйн салбар бизнес болон хөгжих боломжтой, малчдын сарын орлого нэмэгдэж цаашид 5 сая төгрөгт хүрнэ, залуус хөдөөд гарч энэ салбарыг хөгжүүлэх хүсэлтэй болно, малчид нэгдэн дундын бэлчээртэй болно, худаг усаа нийлж гаргана, хашаа саравчаа ч хамтдаа барина гээд давуу талууд олонтой. Энэхүү хөтөлбөрийг хоршоод дэмжиж байгаагаа илэрхийлж байв. Мөн хөдөө орон нутагт, бүх сум суурин газар, малчин өрх айл бүрт хөтөлбөрийг нэг бүрчлэн танилцуулж, ойлгуулах шаардлагатайг хэлэлцүүлэгт оролцсон малчдын төлөөлөл хэлж байлаа.