Б.ДАВААДАЛАЙ: МОД ТАРИХААС ГАДНА ОЙН САНГАА ХАМГААЛАХ, ХОРТОН ШАВЖТАЙ ТЭМЦЭХ АСУУДАЛ ЧУХАЛ БАЙНА

Монгол Улсын Ерөнхийлөгч У.Хүрэлсүх эх дэлхий, байгаль орчноо хайрлан, зохицон амьдрах монгол уламжлал, зан заншлаа эрхэмлэн, дэлхийн уур амьсгалын өөрчлөлтийн нөлөөллийг бууруулах, ой, усны нөөцийг хамгаалж нэмэгдүүлэх, экологийн тэнцвэрт байдлыг хангах зорилгоор “Тэрбум мод” үндэсний хөдөлгөөнийг санаачлан өрнүүлж, энэ хүрээнд олон ажлыг шат дараатай хэрэгжүүлж байгаа.  Тэрбум мод үндэсний хөдөлгөөнийг санаачлан хэрэгжүүлж эхлэхэд Монгол Улсын ойн сангийн ойрхог чанар 7.96 хувь байсан бол өнөөдрийн байдлаар 8.30 хувьд хүрч, нэмэгджээ. Тэгвэл Монгол Улсын Ерөнхийлөгчийн Эдийн засгийн бодлогын зөвлөх Б.Даваадалай энэ тал дээр анхаарал хандуулан, байр сууриа илэрхийллээ.

Тэрээр,  “мод тарихаас гадна ойн санг хамгаалах ажил чухал байна. Ойг хамгаалах, хөнөөлт хортон шавжтай тэмцэх чиглэлээр хийгдэж буй ажлыг эрчимжүүлэх,  үр дүнг тооцоолох зайлшгүй шаардлагатай байгааг онцоллоо. Түүнийг орон нутагт ажиллах үеэр энэ асуудлыг малчид хамгийн ихээр хөндөж байсан бөгөөд ялангуяа ой мод ихтэй Хангайн бүсийн аймгуудад анхаарах асуудлын дээгүүрт эрэмбэлэгдэж байгааг хэлжээ. Мөн малчид “аргалаа түлж, модоо гамная. Мөн байгаль хамгаалагч, сайн дурын идэвхтэнүүдийг нэмэгдүүлмээр байна” гэдгийг ч ярьж байсан байна.

“Тэрбум мод” үндэсний хөдөлгөөнийг хэрэгжүүлж эхэлснээс хойш өнөөдрийг хүртэл 41.5 сая мод тарьж, зохих арчилгаа, хамгааллын ажлыг гүйцэтгэж байна.

Мөн Мод үржүүлгийн үйл ажиллагаа явуулж буй иргэн, нөхөрлөл, аж ахуй нэгж байгууллагын тоо ч 32.3 хувиар нэмэгдсэн байна.

Ойн хөнөөлт шавжийн тархалтыг тогтоох, тэмцлийн ажил явуулах талбайг сонгох судалгааны ажлыг 15 аймгийн 109 сумын 2.5 сая га талбайд хийж гүйцэтгээд байна.  Ойн санг хөнөөлт шавжаас хамгаалах ажлын хүрээнд зөвхөн энэ 2024 онд л гэхэд 265.8 мянган га талбайд улсын болоод орон нутгийн төсвөөр “Рио Тинто” ХХК-тай хамтран хэрэгжүүлж байгаа “Эрүүл ой” төслийн санхүүжилтээр хийж гүйцэтгэжээ. Ойн хөнөөлт шавжтай тэмцэх ажлыг зохион байгуулснаар 0.9 тэрбум модыг доройтолд өртөн, хатаж хуурайших эрсдэлээс хамгаалаад байна. 

Цаашид Ойн хөнөөлт шавж, өвчний тархалтыг хязгаарлах, тоо толгойн нягтшилыг бууруулах тэмцлийн ажлыг 330.0 мянган га талбайд хамруулан зохион байгуулж, 1.2 тэрбум модыг доройтолд өртөхөөс урьдчилан сэргийлнэ. 

Тиймээс “Тэрбум мод” үндэсний хөдөлгөөний хүрээнд хортон шавьж устгах, ой цэвэрлэх ажилд зориулсан төсөв хөрөнгийг ч дөрөв дахин нэмэгдүүлжээ. Ингэснээр арчилгаа хамгааллын ажил сайжирч, ойн санг хамгаалан нэмэгдүүлж чадах юм. Ийнхүү Монгол Улс дэлхий нийтийн өмнө амласан цөлжилтийн эсрэг үүрэг рольтой байж, тэрбумаар тоологдох мод тарихын тулд хүн бүрийн үүрэг оролцоо чухал гэдгийг бодитоор ажил хэрэг болгож байгаа, гэхдээ дээр дурдсанчлан анхаарах зүйл ч их байна гэдгийг Монгол Улсын Ерөнхийлөгчийн Эдийн засгийн бодлогын зөвлөх Б.Даваадалай онцолж байгаа юм.