НАМУУДЫН СОНГОЛТ ХЭР ЧАНСААТАЙ БОЛСОН БЭ?

УИХ-ын 2024 оны ээлжит сонгуульд өрсөлдөх нам, эвсэлүүд тус тусын нэр дэвшигчдээ тодруулаад 4 хонож байна. Тэгвэл энэхүү явц сонгуулийн түүхэнд урьд өмнө тохиож байгаагүй, мөн зарим намын хувьд улс төрийн амьдралд цоо шинэ салхи оруулсан, дэвшилтэт үйл явц болж байна гэж иргэд сонгогчид үзэж байна. Энэ удаагийн сонгуульд намууд жагсаалтаар 48, харин тойргоос 78 нэр дэвшигчийг тодруулж байгаа юм.

Иргэд сонгогчдын зүгээс Монгол Ардын намын жагсаалтаар нэр дэвшигчдийг тус намын дарга, МУ-ын Ерөнхий сайд Л.Оюун-Эрдэнэ тэргүүлнэ гэсэн хүлээлттэй байсан. Гэсэн ч тэрээр сонгуулийн тойрогт нэр дэвшихээр болсон байна. Тэгвэл энэ жагсаалтыг Токиогийн их сургууль төгссөн инженер мэргэжилтэй Г.Лувсанжамц тэргүүлсэн бөгөөд жагсаалтын эхэнд гадаадын томоохон их, дээд сургууль төгссөн чадварлаг залуу мэргэжилтнүүд, улс төрийн ямар нэг намтар түүхгүй, салбар бүрийн төлөөлөл болсон иргэд байгаад сонгогчид ам сайтай байна. Гэтэл Ардчилсан намын хувьд жагсаалтын эхэнд намын дарга нь өөрийгөө тавьсныг иргэд төдийгүй намынх нь гишүүд дэмжигчид таагүй хүлээн авсан.

Ер нь Монгол Ардын нам оюунлаг залуусаараа гангарч байна гэж хэлж болохоор байна.  Тэдний нэг бол УИХ-ын сонгуулийн нэгдүгээр тойрогт Архангай, Өвөрхангай, Баянхонгор аймагт нэр дэвшиж буй Батсуурийн Даваадалай юм.

Батсуурийн Даваадалай нь 2007 онд Монгол Улсын их сургуулийн Эдийн засгийн сургуулийг Банкны эдийн засгийн мэргэжлээр төгсөж, АНУ-ын Нью Йорк хотын Колумбын их сургуульд Эдийн засгийн ухааны магистрын зэрэг хамгаалсан. Монгол Улсын их сургуулийн Бизнесийн сургуульд докторантурт суралцсан.

Ажлын туршлагын хувьд 2007-2014 онд Монгол банкны Мөнгөний бодлого, судалгааны газарт эдийн засагч, 2013-2014 онд Дэлхийн банкны төв оффисын Зүүн Өмнөд Ази, Номхон далайн бүс нутгийн багт зөвлөх, 2015-2021 онд Дэлхийн банкинд эдийн засагч, 2021 онд Монгол Улсын Засгийн газрын гишүүн, Сангийн сайдын зөвлөхөөр ажиллаж байгаад Монгол Улсын Ерөнхийлөгчийн Эдийн засгийн бодлогын зөвлөхөөр өнөөг хүртэл ажиллаж байгаа шилдэг залуу боловсон хүчин юм.

Батсуурийн Даваадалай нь “Төсөв, мөнгөний бодлогын уялдаа, “Динамик ерөнхий тэнцвэрийн загвар”, “Валютын захын дарамтын индекс”, “Инфляцийн төсөөллийн тодорхой бус байдал” зэрэг Монголбанкны томоохон судалгааны ажил, товхимолуудыг эмхэтгэсэн, мэргэжлээрээ чамбайрч өөрийгөө илтгэж чадах нэгэн ажээ. Одоо өөрийн төрж өссөн Баянхонгор аймаг, цаашлаад Хангайн бүсээс иргэдээ төлөөлөх нэгэн болохоор зорьж байгаад нь алга таших хүн цөөнгүй байгаа юм. Яг энэ мэтчилэн нүдээ олсон зөв сонголт хийж, нүүдлээ оновчтой хийх нь улс төрийн намуудын хэр чансааг илтгэж, олон нийтийн итгэлийг хүлээх боломжийг олгож байна.

                                                                                                          Сэтгүүлч Д.Халиун