Хангайн бүсэд 400 гаруй хоршоо байгуулагдаж, 4000 орчим малчин гишүүнээр элсжээ

Хангайн бүсийн малчид, хоршоологчид өнөөдөр Архангай аймагт чуулж байна. Тэд хоршооныхоо сайн туршлага, шинэлэг санааг хуваалцахаас гадна цаашид хоршооны хэмжээнд хийж хэрэгжүүлэх төлөвлөгөө, ажлынхаа талаар зөвлөлдөж буй. 
Зөвлөгөөний үеэр Монгол Улсын сайд, ЗГХЭГ-ын дарга Д.Амарбаясгалан “Шинэ хоршоо” хөдөлгөөний тухай мэдээлэл өгөхөөс гадна тус хөдөлгөөнтэй холбоотой гарч буй иргэд, малчдыг төөрөгдүүлсэн мэдээлэлд албан ёсны тайлбар хийлээ. Тухайлбал, Монгол Улсын Засгийн газраас “Шинэ хоршоо” хөдөлгөөний хүрээнд таван жилийн хугацаатай, таван их наяд төгрөгийн хөтөлбөрийг зарласан бөгөөд энэ хүрээнд хоршоод зээл авч, хөрөнгө оруулалтаа хийн бизнесээ эргэлдүүлнэ. Монголбанк арилжааны банкуудтай хамтын ажиллагааны гэрээ байгуулчихсан учраас тус хөтөлбөр багадаа 4-5, цаашлаад 10-20 жил үргэлжлэх боломжтой гэдгийг хэлээд өнгөрсөн хугацаанд шинээр байгуулагдсан хоршооны тоон мэдээллийг танилцуулав.

1990 оноос хойш 30 жилийн хугацаанд мал аж ахуйн салбарын үйлдвэрлэл эрхлэх зорилгоор 1500 хоршоо байгуулагдсан бол “Шинэ хоршоо” хөдөлгөөнийг хэрэгжүүлж эхэлснээс хойш нэг сарын хугацаанд 2500 орчим хоршоо шинээр байгуулагдаж, 25908 малчин гишүүнээр элссэн байна. Тэгвэл хангайн бүсийнхэн сар хүрэхгүй хугацаанд хамгийн олон хоршоог шинээр байгуулжээ. Тухайлбал, Архангай аймагт шинээр 296 хоршоо байгуулагдаж, 2454 малчин гишүүнээр элссэн бол Өвөрхангай аймагт 703 гишүүнтэй 66 хоршоо, Баянхонгор амагт  557 гишүүнтэй 50 хоршоо шинээр байгуулагдан үйл ажиллагаагаа явуулж эхэлсэн байна.