Б.Даваадалай: Ёс зүйтэй улс төрч байхыг эрхэмлэнэ

 УИХ-ын сонгуулийн нэгдүгээр тойрог буюу хангайн бүсэд  “Ард түмний ялалт” байгуулахаар МАН-ын 9 нэр дэвшигч иргэдтэй уулзан, хийсэн ажлаа танилцуулж, хийх ажлаа зөвлөлдөж байна. Эдгээр нэр дэвшигчдийн бүрэлдэхүүнд дэлхийн хэмжээний мэдлэг боловсрол эзэмшиж, олон улсад монгол хүний оюуны цар хүрээг таниулахад чухал үүрэг гүйцэтгэсэн Батсуурийн Даваадалай шигтгээ болон өрсөлдөж буй юм. Тэрээр Баянхонгор аймагт төрж, өссөн, ардын багш нарын хүү гэдгээрээ олон түмэнд аль хэдийн танигджээ.

  Нэр дэвшигчдийн нэг дэх баг буюу УИХ-ын дарга Г.Занданшатар, УИХ-ын гишүүн Г.Ганболд, Монгол Улсын 26 дахь Эрүүл мэндийн сайд А.Цогцэцэг болон Ерөнхийлөгчийн Эдийн засгийн бодлогын зөвлөх Б.Даваадалай нар зургаа дугаар сарын 12-ны байдлаар Баянхонгор аймгийн Бөмбөгөр, Бууцагаан, Хүрээмарал, Баянбулаг, Гурванбулаг,Заг сумын иргэдтэй уулзаад байна. Иргэд МАН-ын нэр дэвшигчдийг багаар нь дэмжихээ илэрхийллээ. Учир нь хангайн бүсэд өрсөлдөж буй эдгээр нэр дэвшигч нарт мэдлэг чадвар, туршлага, улс төрийн ноён нуруу, ёс зүй гээд бүхий л давуу тал байна гэдгийг уулзалтад оролцсон иргэд онцоллоо. Мөн оновчтой мөрийн хөтөлбөр энэ багийн том давуу тал болж байна. Хоосон амласан бус бодитой хэрэгжих, амьдралд ойр бөгөөд хамгийн их тулгамдсан асуудлыг мөрийн хөтөлбөртөө багтаасан гэж сонгогчид дүгнэж байна.
Тухайлбал нэр дэвшигч Батсуурийн Даваадалай нь Монгол Улсын төрийн тэргүүнд Эдийн засгийн бодлого зөвлөдөг хариуцлагатай албыг хашиж, эрүүл аюулгүй хүнсээр дотоодын хэрэгцээгээ хангах “Хүнсний хувьсгал”, Малын түүхий эдийг үнэд хүргэж, малчдын орлогыг нэмэгдүүлэх “Цагаан алт” зэрэг ард түмний дунд сайшаалтай байгаа томоохон бодлогыг боловсруулжээ. Мөн Их эзэн богд Чингис хааны зарлигийг энэ цаг үед биелүүлэх “Шинэ Хархорум” хотыг сэргээн байгуулах ажлыг ахлаж байна. Энэхүү хотыг байгуулснаар зөвхөн түүх соёлоо хүндэтгэх гэхээсээ илүү Монгол Улсын хөгжил дэвшлийг шинэ шатанд гаргаж, дэлхийн анхаарлын төвд хүргэх томоохон ач холбогдолтой. Б.Даваадалай нь энэ бүх ажлыг мөрийн хөтөлбөртэй уялдуулж, илүү эрчимжүүлэхээ бодит тооцоо судалгаатай ярьсан нь иргэдэд өндөр сэтгэгдэл үлдээж байна. Тэрээр уулзалтын үеэр ёс зүйтэй улс төрч байхыг хамгийн эрхэмд тавихаа мөн амлаж байв.