БАЯНЗҮРХ ДҮҮРГИЙН ЗАСАГ ДАРГА ХЭН БОЛОХ МАГАДЛАЛТАЙ ВЭ?

Үндсэн хуулийн нэмэлт өөрчлөлтийн хүрээнд УИХ-ын ээлжит сонгууль бүсчилсэн байдлаар явагдаж, Монгол Улс анх удаа 126 парламентын гишүүнтэй боллоо. Энэ цаг үед зарим дүүргийн Засаг даргыг чухам хэн болох бол гэсэн хүлээлт үүсээд байгаа юм. Тухайлбал, хамгийн олон хүн амтай Баянзүрх дүүргийн Засаг дарга Н.Баярмөнх ажлаа өгснөөр энэ дүүргийг удирдах магадлалтай хүмүүсийн талаарх таамагууд ч хөвөрсөөр...

Энэ таамагт БЗД-ийн Засаг даргын орлогч Г.Жаргалсайхан, НИТХ-ын төлөөлөгч, “Үндэсний цэцэрлэгт хүрээлэн”-гийн дарга Ү.Оюунзул, БЗД-ийн ИТХ-ын дарга А.Баяр нар нэрлэгдэж байна. Аль аль нь эрч хүчтэй, ирээдүйд илүү ихийг хийх чадалтай тэмүүлэл дүүрэн залуус. БЗД-ийн Засаг даргын орлогч, БЗД-ийн ИТХ-ын төлөөлөгч Г.Жаргалсайхан бол өнгөрсөн 4 жилд дүүргийнхээ орлогч даргын албыг хашиж, сайн мууг туулсан, яах аргагүй хөдөлмөрч залуу. Үер усны үеэр ч урдаа гарч ажиллан, дайчин чанараа гаргаж чадсан. Харин “Үндэсний цэцэрлэгт хүрээлэн”-гийн дарга Ү.Оюунзулын хувьд 2020 онд мөн л энэ мест дээр нэр нь яригдаж байгаад, өөр томилгоо орж ирсэн. Гэсэн ч удирдах ур чадвараас гадна аж ахуйн чимхлүүр ажилд илүү чамбай гэдгээ харуулж “Үндэсний цэцэрлэгт хүрээлэн” хэмээх нийслэлийн харьяа байгууллагыг шаггүй удирдаад рейтингээ өсгөчихсөн. Бас дүүргийн Засаг дарга бол НИТХ-д төлөөлөгч байх ёстой гэсэн үндсэн шаардлагыг хангаж байгаа. БЗД-ийн ИТХ-ын дарга, БЗД-ийн ИТХ-ын төлөөлөгч А.Баярын хувьд дүүргийнхээ ИТХ-ын хурлыг 4 жил удирдсан, эмч мэргэжилтэй хүн. Түүний сурч мэдсэн анагаах чадвар дүүргийн хөгжил рүү илүүтэй чиглэсэн гэхэд болно.

Эндээс харахад хоёр залуугийн хувьд анхан шатны бүтцийн төлөөлөл гэдгээрээ дүүргийн дотоод бүтцэд багтаж, хангалттай зүтгэсэн тул ийнхүү зүй ёсоор нэрлэгдэж байна. Дүүргийн зүгээс ч сайн дэмжлэг авах магадлалтай. Тэгвэл эмэгтэй төлөөлөл болох Ү.Оюунзулын хувьд Нийслэлийн ИТХ-ын төлөөлөгчийн хувиар хийж хэрэгжүүлсэн ажлын тоо, чанараар төлөөлөгч нар дотроо нэлээн дээгүүрт эрэмбэлэгддэг, хийе гэснээ хийчихдэг эршүүд зоримог талдаа нэгэн. Гурвуулаа СДМЗХ-ны удирдах зөвлөлд багтдаг, нэгэн үеийн шижигнэсэн залуус. Тэр дотроо А.Баяр, Ү.Оюунзул нар нь тус холбооны дэд ерөнхийлөгчийн хариуцлагатай албыг хашдаг. Гэхдээ хоёронтоо нэр нь яригдаад байгаа НИТХ-ын төлөөлөгч, хүрээлэнгийн дарга бүсгүй Ү.Оюунзулд энэ удаа итгэл өгч дэмжвэл хүн ам ихтэй, нийгмийн салбарт хийх ажил олонтой энэ дүүрэгт илүү тохиромжтой томилгоо болно.