МАН-ын дарга Н.Учрал УИХ-ын даргаас чөлөөлөгдөж, Ерөнхий сайдаар томилогдов. Тиймээс дараагийн УИХ-ын даргын марафон МАН-ын бүлэг дотор эхэлсэн.
Г.Занданшатарын Засгийн газар огцрох нь, намын дарга Н.Учрал Ерөнхий сайдаар томилогдох нь ойлгомжтой болж эхэлсэн цагаас УИХ-ын дарга болох хүсэлтэй МАН-ын гишүүд "хөөцөлдөж" эхэлсэн гэсэн яриа улс төрийн хүрээнд гараад удаж байгаа. Тэгвэл өнөөдрийн байдлаар МАН-ынхан УИХ-ын даргаар сонгох хүн дээрээ тохироогүй байна. Харин УИХ-ын дарга болох амбицтай, хийж чадахаар, бэлтгэгдсэн улстөрч МАН-д цөөнгүй бий. Тодруулбал, УИХ-ын дэд дарга Ж.Бат-Эрдэнэ, Сангийн сайд Б.Жавхлан, ЗГХЭГ-ын дарга С.Бямбацогт нарын нэр дараагийн УИХ-ын даргад яригдаж байгаа. Тэд бүгд төрд олон жил ажилласан, туршлагатай улстөрчид.
Сангийн сайд Б.Жавхлан дараагийн УИХ-ын дарга болох хамгийн магадлалтай хүмүүсийн нэгээр яригдаж байна. Тэрээр У.Хүрэлсүхийн Засгийн газраас буюу 2021 оноос Сангийн сайдаар ажиллаж байгаа. Өнөөдрийн эдийн засгийн сайн, муутай салшгүй холбоотой хүн. 2016 оноос хойш парламентын гишүүнээр ажиллаж, төрийн ажлын туршлагатай болсон улстөрчдийн нэг. Энэ утгаараа УИХ-ын даргын албыг өлхөн хийгээд явчихна. Нөгөө талаас У.Хүрэлсүхийн үеэл гэгддэг Б.Жавхланд Ерөнхийлөгчийн дэмжлэг ч байгаа биз ээ.
УИХ-ын дэд дарга Ж.Бат-Эрдэнэ УИХ-ын даргад яригдаж байна. Тэрээр УИХ-ын дарга Д.Амарбаясгалангийн талынх. Энэ утгаараа Д.Амарбаясгалан өөрийн талаасаа УИХ-ын даргад хүнээ тавина гэвэл Ж.Бат-Эрдэнэ хамгийн өндөр магадлалтай улстөрчдийн нэгээр яригдаж байна. Тэрээр мөн л олон жил төрд зүтгэсэн, төрийн ажлын туршлагатай улстөрч.
ЗГХЭГ-ын дарга С.Бямбацогт УИХ-ын дарга болох хүсэлтэй байгаа хүмүүсийн нэг. Тэрээр Г.Занданшатарын Засгийн газрыг унагасан саналын томьёолол Үндсэн хууль зөрчсөн, эсэх Цэцийн маргаанд Засгийн газрыг төлөөлж оролцож, өөрийгөө шаггүй улстөрч болсон гэдгээ баталж харуулж чадсан. Мөн л УИХ-ын дарга хийгээд явчих чадвартай,туршлагатай болсон улстөрч.
УИХ-ын дарга болохоор яригдаж байгаа дээрх хүмүүсийн хэн нь ч УИХ-ын даргаар ажиллаж чадах туршлагатай. Гол нь удирдлагуудын дэмжлэгтэй нь парламентын спикерийн албан тушаалд очих биз ээ.
МАН-ынхан өнөөдөр, маргаашдаа багтаад УИХ-ын дарга дээрээ тохирч, УИХ дахь бүлгээ хуралдуулахаар төлөвлөж байгаа аж. УИХ-ын даргыг сонгохдоо эхлээд УИХ дахь намын бүлгээрээ хэлэлцүүлж, улс төрийн шийдвэрээ гаргаад УИХ-ын холбогдох байнгын хороо, нэгдсэн чуулганаар хэлэлцүүлэн сонгодог.
Сэтгэгдэл бичих