МАН улс төрийн шийдвэр гаргахдаа эхлээд намын дарга нар нь шийдчихээд шат шатны хурлаа хийж баталгаажуулж ирсэн.
Тэгвэл энэ удаад 35 дахь Ерөнхий сайдаар томилогдсон Н.Учрал Засгийн газрын бүрэлдэхүүнээ томилж, дараагийн УИХ-ын дарга дээрээ ч тохирч чадахгүй тав хонолоо. УИХ-ын дарга, сайд болох хүсэлтэй хүмүүс энэ өдрүүдэд намын дарга, Ерөнхий сайдынхаа амар заяаг үзүүлэхгүй их ч хөөцөлдлөө.
УИХ-ын даргад хэд хэдэн гишүүний нэр яригдаж байгаа бөгөөд тэд бүгд өөрсдөө УИХ-ын дарга болох хүсэлтээ илэрхийлж, уулзалтууд хийж байгаа хүмүүс гэсэн үг. Тэгвэл хамгийн сүүлийн байдлаар ЗГХЭГ-ын дарга С.Бямбацогт, УИХ-ын гишүүн С.Амарсайхан нарын нэр тунаж үлдсэн талаар эх сурвалжууд мэдээлж байгаа.
Өчигдөр 16.00 цагт МАН Удирдах зөвлөлийн хурлаа зарласан ч хуралдуулж чадахгүй өнөөдөр 09.00 цаг болгон хойшлуулсан. Энэ нь УИХ-ын дарга дээрээ тохирч чадахгүй байгаагийн хамгийн том илэрхийлэл юм. Учир нь 38:30-аараа хуваагдсан УИХ дахь МАН-ын бүлгийн гишүүд нь УИХ-ын дарга болохоор яригдаж байгаа хүмүүсээ дэмжихгүй, өөрсдийн хүнээ сонгуулахаар зүтгүүлж байгаа гэх. Тиймээс Удирдах зөвлөлөөс нэг хүн дээрээ тохирч чадахгүй бол УИХ дахь намын бүлгийн гишүүдээрээ шийдүүлэх хувилбар ярьж байгаа аж. Тиймээс намын бүлэг дээр санал хураалт явуулж магадгүй байгаа учраас бүлгийн ажлын албаныхан санал хураах бэлтгэл ажлыг өчигдөр хангажээ. Хэрвээ бүлэг дээрээ санал хурааж УИХ-ын даргаа сонговол ЗГХЭГ-ын дарга С.Бямбацогтын талынхан буюу 38-ынхан олонх болж С.Бямбацогт УИХ-ын даргаар сонгогдох магадлал их байгаа юм. 30-ынхан буюу С.Амарсайханы талынхан цөөнх учраас бүлэг дээр санал хураалт явуулбал тэдэнд ашиггүй. Ямартаа ч одоо хуралдаж буй Удирдах зөвлөл шийдвэр гаргаж, үргэлжлүүлээд УИХ дахь бүлэг нь хуралдана.
Сэтгэгдэл бичих