Улаанбаатар, 2026 оны дөрөвдүгээр сарын 15 /МОНЦАМЭ/. Хиймэл оюунд суурилсан англи хэлний сургалтын “EF EFEKTA” хөтөлбөрийг хэрэгжүүлэгч байгууллагын төлөөлөлтэй Боловсролын сайд Л.Энх-Амгалан уулзаж, төслийн явц, үр дүнтэй танилцлаа.
Тус хөтөлбөр Налайх, Багануур, Багахангай дүүргийн ерөнхий боловсролын сургуулийн 8-12 дугаар ангийн 7000 гаруй сурагч, МСҮТ-ийн оюутнууд, төрийн албан хаагчид, англи хэл болон мэдээлэл зүйн 2000 гаруй багш нарыг хамруулсан ба нийт 10 мянга гаруй хүнийг хамарчээ.
Олон улсын судалгааны, "EF English Proficiency Index"-ийн 2024-2025 оны тайланд дурдсанаар Монгол Улс дэлхийн 116 орноос 84 дүгээр байрт эрэмбэлэгдэж, нийт хүн амын 5-10 хувь нь англи хэлээр харилцах чадвартай гэж үнэлэгдсэн байна. Мөн Монгол Улсад ажиллаж буй 6200 гаруй англи хэлний багшийн 62 хувь нь олон улсын стандартын шаардлага хангадаггүй бол 38 хувь нь шаардлага хангасан түвшний мэдлэгтэй байгаа талаар UNICEF болон Их Британитай хамтарсан төслийн судалгаанд дурджээ.
Иймээс англи хэлний боловсролыг сайжруулах зорилгоор хиймэл оюун, дэвшилтэт технологид суурилсан “EF EFEKTA” онлайн сургалтын төслийг монголд хэрэгжүүлж байна. Уг сургалтад хамрагдсан суралцагчид сургалтын эхэнд өөрийн түвшинг тодорхойлж, бодит үнэлгээнд тулгуурлан суралцдаг. Мөн өөрийн хүссэн хурдаар суралцах, бусдаас айж эмээлгүй бие даан дадлага хийх, унших, бичих, ярих, сонсох чадварыг цогцоор нь хөгжүүлэх боломж бүрдэж байгаа юм. Түүнчлэн хиймэл оюун ухааныг ашиглан суралцах дадал эзэмшиж байгаагаараа онцлогтой.
Энэхүү төсөл нь ерөнхий боловсролын сургуулийн онлайн англи хэлний сургалтын агуулгыг дэмжихээс гадна багшийн хомсдлыг бууруулах, багшийн ажлын ачааллыг хөнгөвчлөх, хичээлийг бүтээлчээр заах боломж бүрдэх юм. Төсөл хэрэгжүүлж эхэлснээс хойш 10 долоо хоногийн хугацаанд хүүхдүүд 3-4 шат ахисан үзүүлэлттэй байна. Уг төслийг улсын хэмжээнд болгон өргөжүүлснээр багшийн хүрэлцээ хангамжаас үл хамаарч хүүхдүүдийн англи хэлний мэдлэг хурдан хугацаанд сайжирч олон улсын их дээд сургуульд элсэн ороход нь түлхэц өгөх юм.
“EF EFEKTA” байгууллагаас багш нарын чадварыг дээшлүүлэх зорилготой английн сургалтын төвүүдэд долоон хоног зардлыг нь дааж сургах боломжтой. Багш нарт урт хугацааны тогтвортой хөтөлбөр шаардлагатай байгааг уулзалтын үеэр дурдсан талаар Боловсролын яамнаас мэдээлэв.
Сэтгэгдэл бичих