БЭЭЖИН, 2026 оны дөрөвдүгээр сарын 15 /Reuters/. Шэньжэнь хотын аж үйлдвэрийн парк дахь олон давхар авто зогсоолд нь мягмар гаргийн өглөө гал гарсан тухай Хятадын цахилгаан автомашин үйлдвэрлэгч "BYD" компани мэдээлжээ.
Гал гарсан тус зогсоол нь туршилтын болон ашиглалтаас гаргасан тээврийн хэрэгслүүдийг байрлуулдаг зогсоол байсан ба галыг бүрэн унтраажээ. Хүний амь нас эрсдээгүй болохыг тус компани мэдэгдэлдээ дурдсан байна.
Цахилгаан автомашин үйлдвэрлэгч томоохон компаниудын нэг болох "BYD" компанийн төв байр Шэньжэнь хотын Пиншань дүүрэгт байрладаг.
Энэхүү мэдээллийн дараа тус компанийн хувьцааны ханш 0.6 хувиар буурсан байна.
Ослын газарт авсан дүрс бичлэгээс үзвэл, олон давхар зогсоолын барилгаас өтгөн хар утаа суунаглаж, гал их хэмжээгээр тархсан байсан бөгөөд гал түймэртэй тэмцэх алба болон цагдаагийн бүрэлдэхүүн шуурхай ажиллажээ.
Цахилгаан автомашин нь дотоод шаталтын хөдөлгүүртэй автомашиныг бодвол гал түймэр гарах үед унтраахад илүү төвөгтэй, удаан үргэлжилдэг бөгөөд дахин асах эрсдэл өндөртэй байдаг ажээ.
Сэтгэгдэл бичих