Танилц:Улаанбаатарын төв замаар явах цахилгаан соронзон галт тэрэг

Тус цогц төсөлд:

• Автобусны парк шинэчлэлт 
• Цахилгаан соронзон галт тэрэг
• Шинэ төрлийн такси үйлчилгээ
• Агаарын такси гэж нэрлэгдэх Агаарын дүүжин тээвэр
• Тусгай замын автобусыг шинээр нэвтрүүлэх зэрэг багтаж байгаа бөгөөд түрээсийн дугуй үйлчилгээг ч үе шаттайгаар нэмэгдүүлэхээр төлөвлөж байгаа аж.

Мөн тэрбээр Агаарын дүүжин тээврийн ажлыг дөрөвдүгээр сараас эхлүүлэхээр төлөвлөж буйгаа мэдэгдсэн.

Парк шинэчлэлтийн талаар Нийслэлийн Засаг дарга С.Амарсайхан хэлэхдээ "Энэ жилдээ багтаж 600-аас доошгүй автобусанд парк шинэчлэлийг хийнэ" гэсэн билээ. Энэ хүрээнд “Yinlong Energy”​ компанийн 10 цахилгаан автобусыг оруулж ирж, наймыг нь төв замаар туршилтаар явуулахаар болоод буй.

Тэгвэл Цахилгаан соронзон галт тэргийг эхний ээлжинд Энхтайваны өргөн чөлөөний дагуу, Амгалангаас Таван шар хүртэл үйлчилгээнд нэвтрүүлэх бөгөөд 12.2 км урттай, 14 зогсоол бүхий байгууламж барихаар төлөвлөжээ. 

Ингэснээр төв замын авто замын ачаалал 68 хүртэлх хувиар буурах бөгөөд 14 зогсоол бүрээс иргэд төрийн үйлчилгээг цахимаар авах боломжтой аж.

Цахилгаан соронзон галт тэргийг үйлчилгээнд явуулах хоёр, гуравдугаар чиглэл нь хотыг тойрог хэлбэрээр хамарсан болон Шинэ нисэх онгоцны буудал, Налайх, Зуун мод, Майдар Сити чиглэл юм.

Иргэдийн хүлээх хугацаа нь 3-5 минут ба өдөрт 210 мянга хүртэлх зорчигч тээвэрлэх хүчин чадалтай аж.