Улаанбаатар хотын түгжрэлийг бууруулах зорилготой "Туулын хурдны зам" төсөл тойрсон маргаан эрчээ авч байна. УИХ-ын гишүүн С.Цэнгүүн тус төслийн техник эдийн засгийн үндэслэл (ТЭЗҮ) тодорхойгүй, байгаль орчны үнэлгээ бүрэн гараагүй байхад ажлыг эхлүүлсэнд шүүмжлэлтэй хандаж, холбогдох гэрээг олон нийтэд нээлттэй болгохыг шаардлаа.
Тэрээр хэлэхдээ, энэхүү төслийг эхнээс нь иргэний нийгмийн байгууллагууд болон улс төрийн намууд эсэргүүцсээр ирсэн бөгөөд Ерөнхий сайд Н.Учрал тус төслийг түр хугацаагаар зогсоох шийдвэр гаргасныг онцлов.
Төсөвт өртөг: 2025 оны 4 дүгээр сард нийслэлийн Иргэдийн Төлөөлөгчдийн Хурлаар тус төслийн өртгийг 2.3 их наяд төгрөг болгон нэмэгдүүлсэн.
Тендерийн маргаан: 2025 оны 4 дүгээр сарын 23-нд зарлагдсан тендер хойшлогдсоор 8 дугаар сард "Хуаяань групп" компани шалгарсан байна.
Трассын өөрчлөлт: Газар чөлөөлөлт болон бусад шалтгаанаар төслийн трассыг 13 удаа өөрчилсөн нь төсөл хэр зэрэг судалгаа муутай эхэлснийг илтгэж байна.
С.Цэнгүүн гишүүний хэлснээр, одоогийн байдлаар 500 гаруй тэрбум төгрөг урьдчилгаа төлбөр хэлбэрээр тус төсөл рүү шилжсэн байх магадлалтай байгаа аж. Гэвч энэхүү мөнгө ямар гэрээний дагуу, хэний данс руу шилжсэн нь тодорхойгүй, гэрээ нь өөрөө "нууц" зэрэглэлд байгааг тэрээр шүүмжиллээ.
"Зөвхөн төслийг зогсоолоо гээд мартаж болохгүй. Хариуцлагагүй шийдвэр гаргаж, улсын төсвийг үрэн таран хийсэн хүмүүст хариуцлага тооцож, энэ их хэмжээний мөнгийг буцаан төвлөрүүлэх ёстой."
Ардчилсан намын бүлгийн зүгээс дараах шаардлагуудыг тавьж байна:
-
Туулын хурдны замтай холбоотой бүх гэрээг олон нийтэд ил болгох.
-
УИХ-ын Хянан шалгах түр хороо болон Төсвийн зарлагын дэд хороогоор дамжуулан ажлын хэсэг гаргаж, санхүүжилтийг шалгах.
-
"Харбин" болон бусад нууцлагдмал байгаа гэрээнүүдийг ил болгох замаар Монгол Улсад үүсээд буй "нууц гэрээний засаглал"-ыг халах.
Төгсгөлд нь, төрийн өмнөөс гэрээ байгуулсан этгээдүүд хуулийн өмнө хариуцлага хүлээхгүйгээр олон жилийн алдагдлыг улс оронд үлдээдэг байдлыг зогсоохын төлөө тууштай ажиллахаа мэдэгдлээ.
Сэтгэгдэл бичих