Сүүлийн үед цахим орчинд “Согтуу гадаадын иргэд төв талбай дээр бие засаад зогсохгүй, шаардлага тавьсан цагдааг үл тоов” гэх гарчигтай мэдээлэл иргэдийн бухимдлыг ихээхэн төрүүлээд байсан билээ. Тэгвэл уг асуудал хуулийн дагуу шийдвэрлэгдэж, буруутай этгээдүүдэд шүүхээс зохих шийтгэлийг нь оногдуулсан байна.
Уг зөрчил нь 2024 оны 05 дугаар сарын 10-ны өдөр цагдаагийн байгууллагад бүртгэгджээ. Хэргийг шалгахад гадаад улсын иргэд согтуурсан үедээ олон нийтийн газар зүй бус авирлаж, төрийн албан хаагчийн тавьсан хууль ёсны шаардлагыг эсэргүүцсэн болох нь тогтоогдсон байна.
Цагдаагийн байгууллагаас уг үйлдлийг Зөрчлийн тухай хуулийн дараах зүйл заалтуудаар шалгаж, шүүхэд шилжүүлжээ:
-
5.1 дүгээр зүйл: Олон нийтийн газарт зүй бусаар биеэ авч явах
-
5.2 дугаар зүйл: Танхайрах
-
15.2 дугаар зүйл: Төрийн албан тушаалтны шийдвэрийг үл биелүүлэх, үйл ажиллагаанд саад учруулах
Шүүхээс тухайн иргэдийн гаргасан үйлдэл бүрд нь хариуцлага тооцож, дараах шийтгэлийг оногдууллаа:
-
Олон нийтийн газар бие зассан үйлдэлд: 10 нэгжээр торгох;
-
Төрийн албан хаагчийн шаардлагыг биелүүлээгүй үйлдэлд: 250 нэгжээр торгох;
-
Бусдыг үл хүндэтгэж танхайрсан үйлдэлд: 20 хоногийн хугацаагаар баривчлах шийтгэл тус тус оногдуулав.
Монгол Улсын нутаг дэвсгэрт байгаа хэн бүхэн (иргэн, гадаадын иргэн, харьяалалгүй хүн) Монгол Улсын хууль тогтоомжийг сахин биелүүлэх үүрэгтэй. Олон нийтийн газар биеэ зүй бусаар авч явах, төрийн албан хаагчийн хууль ёсны шаардлагыг үл тоомсорлох нь хуулийн хатуу хариуцлага хүлээх үндэслэл болно.
Сэтгэгдэл бичих