Нийслэлийн МАН-ын хорооны хурал өнөөдөр /2026.04.23/ болж байна. Хурлын үеэр Улаанбаатар хотын Засаг дарга Х.Нямбаатар, нийслэлийн намын хорооны хурлаар ямар асуудал хэлэлцэх талаар сэтгүүлчдэд мэдээлэл өглөө.
Улаанбаатар хотын Засаг дарга Х.Нямбаатар:
-Өнгөрсөн 1.6 жилийн хугацаанд нийслэлийн Засаг даргын үйл ажиллагааны мөрийн хөтөлбөрийн хэрэгжилт хэдэн хувьтай явагдаж байгаа талаар тайлан тавина. МАН-ын үндсэн дүрэм, санхүүжилтийн хүрээнд татвар төлөөгүй, төлөөлөгч болон гишүүдэд хариуцлага тооцох буюу нийслэлийн намын хорооны гишүүн, тэргүүлэгчээс чөлөөлөх тогтоолын төслийг хэлэлцүүлж батлуулах байгаа. Зохион байгуулалтын асуудалд хуралд оролцож байгаа хүмүүсээс нийслэлийн намын хорооны даргад нэр дэвшиж даргыг өөрчлөх, чөлөөлөх асуудлыг нээлттэй ил тод байлгана.
Нийслэлийн намын хорооны зарим дэд даргыг чөлөөлж, нөхөн сонгох сонгууль явагдана. Нийслэлийн намын хорооны зарим тэргүүлэгчийг чөлөөлөх бөгөөд дараагийн тэргүүлэгчийг шинээр сонгох асуудлууд хурлаар яригдана. Нийслэлийн намын хорооны гишүүд намын хорооны хуралд хэлэлцэх асуудлаа нээлттэй санал гаргах боломжтой байгаа. Нийслэлийн намын хороо жилд нэг удаа хуралдах ёстой. Миний хувьд нийслэлийн намын хорооны даргаар сонгогдоод жил 11 сар болж байна. Өнгөрсөн жил хурал хийсэн учир энэ жил ч мөн адил нэгдсэн хурал хийнэ.
Надтай хамт өрсөлдөх, нэр дэвших хүсэлтэй нэгэн байвал нээлттэй. Миний хувьд өөрийн цахим хуудсаараа дамжуулан цаашид ажлаа үргэлжлүүлнэ гэдгээ илэрхийлсэн.
Засгийн газраас Туулын хурдны замын ажлыг зогсоох шийдвэр гаргасан талаар одоогоор албан ёсны бичгээр ирүүлсэн шийдвэр, бүрэн хэмжээний мэдээлэл гараагүй байна. Ерөнхий сайд Н.Учрал уг бүтээн байгуулалтыг зогсоож буйг албан ёсоор мэдэгдсэн хэдий ч төслийг албан ёсоор зогсооход тамгатай, баримтжуулсан тогтоол шаардлагатай байгаа юм. Учир нь энэхүү төсөл нь Дэлхийн худалдааны байгууллагын гишүүн орны компани олон улсын нээлттэй тендерт шалгарч, гэрээ байгуулан ажиллаж буй ажил тул албан ёсны тогтоолгүйгээр зогсоох нь олон улсын арбитрын маргаан үүсгэх, гүйцэтгэгч талаас хохирол нэхэмжлэх эрсдэлийг дагуулж байна. Одоогийн байдлаар гүйцэтгэгч талаас нэхэмжилсэн мөнгөн дүн байхгүй байгаа бөгөөд уг асуудлыг хууль хяналтын байгууллагаар шалгуулах шаардлагатай гэж үзэж байна. Тухайлбал, Тендер нээлттэй, ил тод явагдсан эсэх, төсөвт өртөг нь олон улсын жишигт нийцсэн эсэхийг дэлхийд хүлээн зөвшөөрөгдсөн 3-4 хараат бус экспертээр дүгнүүлэх, урьдчилгаа төлбөр хуулийн дагуу олгогдсон эсэх болон уг мөнгө зориулалтын дагуу дансандаа байгаа эсэхийг олон нийтэд ил тод мэдээлэх, төслийг эсэргүүцэж буй иргэдийн жагсаал цуглаан болон тэдний ард байгаа санхүүжилтийн эх үүсвэрийг АТГ-аас нарийвчлан шалгаж, тодорхой болгох хэрэгтэй. Эдгээр асуудлууд нэг мөр шийдэгдэж, шалгалтын ажил дууссаны дараа төсөл цааш үргэлжлэх эсэх нь тодорхой болох юм. Төслийг санаачлан эхлүүлсэн талын хувьд хэрэв ажил зогсоход хүрвэл энэ нь хэн нэгэн хүний нөлөөллөөс болсон уу гэдгийг баримтжуулж үлдээх нь зүйтэй гэсэн байр суурьтай байна.
Сэтгэгдэл бичих