УИХ-ын чуулганы нэгдсэн хуралдаан үргэлжилж байна. Энэ үеэр УИХ-ын гишүүн Б.Пүрэвдорж "Малчдын НДШ-ийг нөхөн төлөх тухай хууль 2025 оны нэгдүгээр сарын 1-ээс нэг жилийн хугацаатай хэрэгжих байсан. Засгийн газар дагалдах журмаа гаргахгүй байсаар хэрэгжих хугацаа нь дуусчихлаа. Энэ заалтыг нэг жилээр сунгах хуулийн төсөл санаачилж өргөн барина. Өнөөдрөөс эхлээд гишүүдээр гарын үсэг зуруулна. Энэ 2026 оны долдугаар сарын 1-нээс ирэх оны долдугаар сарын 1 хүртэл нэг жилийн хугацаатай байна" гэв.
Мөн тэрбээр "МАН сонгуулиаар малчдын гол асуудлыг шийднэ гэж саналыг нь авсан. Үүнийгээ ажил хэрэг болгох хэрэгтэй. Одоо арьс, шир экспортын гарц нэмэгдэж, махны үнэ өсөж, малчдын орлого тодорхой хэмжээнд өсөхөөр байна. Энэ үед НДШ-аа нөхөн төлөх, нийгмийн асуудлаа шийдэх боломжийг нь олгох хэрэгтэй" гэсэн юм.
Эргэн сануулахад, 2021 онд гарсан малчдын НДШ-ийг нэг удаа нөхөн төлөх хуульд 16 мянга гаруй малчин, 6000 гаруй хувиараа хөдөлмөр эрхлэгч хамрагдсан байдаг. Малдчаас энэ хуулийг дахин баталж хэрэгжүүлэх санал хүсэлт маш их ирдэг. Энэ дагуу Г.Тэмүүлэн, Ж.Батжаргал нарын гишүүд хуулийн төсөл санаачлан 2024 оны тавдугаар сард батлуулсан юм.
Сэтгэгдэл бичих