СОФИ, 2026 оны тавдугаар сарын 1 /BTA/. "Гурван тэнгисийн санаачилга"-ын хүрээнд Хорват, Литва, Польш, Румын болон Словени улсуудын хооронд байгуулах бүс нутгийн шинэ түншлэлийг Болгар улс Инновац, хөгжил дэвшлийн яамаараа дамжуулан дэмжинэ гэдгээ мэдэгдсэнийг Европын хөрөнгө оруулалтын банкны бүрэлдэхүүнд багтдаг Европын хөрөнгө оруулалтын сан цахим хуудсандаа мэдээлсэн байна.
Төв болон Зүүн Өмнөд Европын дээрх таван орны үндэсний хөгжлийн банкууд, Европын хөрөнгө оруулалтын сангийн төлөөлөгчид дөрөвдүгээр сарын 28-ны өдөр Дубровник хотноо Харилцан ойлголцлын санамж бичигт гарын үсэг зурж, бүс нутгийн дэд бүтцийн холболтыг сайжруулах зорилготой уг санаачилгыг энэ оны сүүлчээр албан ёсоор эхлүүлэхээр тохиролцжээ.
Шинэ түншлэлийн хүрээнд дэд бүтцийн төслүүдэд дор хаяж 2 тэрбум еврогийн хөрөнгө оруулалт татахаар төлөвлөж байгаа аж. Хөтөлбөрт оролцогч таван улс үндэсний хөгжлийн банкуудаараа дамжуулан нийт 250 сая евро төвлөрүүлэх бөгөөд Европын хөрөнгө оруулалтын сан ижил хэмжээний санхүүжилтээр дэмжлэг үзүүлнэ.
Болгар бүс нутгийн шинэ хамтын ажиллагааг 2035 он хүртэл буюу 10 жилээр сунгасан "JEREMIE" санаачилгаар дамжуулан дэмжинэ гэж тус улсын Инновац, хөгжил дэвшлийн яам мэдэгджээ.
Сэтгэгдэл бичих