Газрын тос олборлогч орнуудын ОПЕК+ бүлгийн долоон улс ирэх зургаадугаар сард өдөрт олборлох квотоо 180 мянга гаруй баррелиар нэмэгдүүлнэ гэдгээ мэдэгдлээ. Уг шийдвэрийг Арабын Нэгдсэн Эмират Улс (АНЭУ) тус бүлгээс гарсны дараа гаргасан байна.
Саудын Араб, ОХУ зэрэг эдгээр улс ням гарагт болсон цахим хурлын дараа хоногийн олборлолтыг 188 мянган баррелиар нэмэгдүүлэхээр шийдвэрлэснээ мэдэгдсэн байна.
Газрын тос экспортлогч орнуудын байгууллага (ОПЕК) болон ОПЕК+-ийн бүрэлдэхүүнээс гарна гэдгээ АНЭУ-ын эрх баригчид өнгөрсөн долоо хоногийн баасан гарагт мэдэгдсэн бөгөөд тус улс ням гаргийн хуралдаанд оролцоогүй байна.
Тус бүлэг тавдугаар сард газрын тосны олборлолтыг хоногт 206 мянган баррелиар нэмэгдүүлэхээр өмнө нь шийдвэрлээд байсан юм. Бүлгийн долоон гишүүн улс зах зээлийн нөхцөл байдлыг цаашид анхааралтай ажиглаж, үнэлэлт дүгнэлт өгнө гэж мэдэгджээ.
Ормузын хоолойгоор дамжих газрын тосны нийлүүлэлт хязгаарлагдмал хэвээр байна. Олборлолтыг нэмэгдүүлэх шийдвэрийг тус хоолой эргэн нээгдэж магадгүй гэсэн таамаглалд үндэслэн гаргасан гэж шинжээчид үзэж байна.
АНУ Ираны эсрэг цэргийн ажиллагаа явуулж болзошгүй гэсэн болгоомжлол үүссэнтэй холбоотойгоор Нью-Йоркийн биржийн арилжааны явцад WTI маркийн газрын тосны фьючерс үнэ пүрэв гарагт нэг баррель нь 110 ам.доллароос давж, сүүлийн гурван долоо хоногийн дээд түвшинд хүрсэн юм.
Сэтгэгдэл бичих