Зээлгүй ахмадуудад дөрөвдүгээр сараас үнэт цаас олгоно

Тэтгэврийн зээл аваагүй ахмад настанд ирэх дөрөвдүгээр сард үнэт цаас олгохоор ажиллаж байгаа аж. Энэ тухай Хөдөлмөр, нийгмийн хамгааллын сайд С.Чинзориг “Засгийн газрын шийдвэрээр энэ оны дөрөвдүгээр сараас үнэт цаасыг ахмадын гарт олгоно. Яг мөнгөжүүлэх хугацаа нь 2021 оны тавдугаар сард гэж хуульд заасан” гэдэг байр суурь илэрхийлээд буй юм.

УИХ-аас ахмад настны тэтгэврийн зээлийг нэг удаадаа чөлөөлөх тухай хуулийн төслийг батлахад улсын хэмжээнд 176 мянга орчим ахмад настан тэтгэврийн зээлгүй гэсэн судалгаа гарсан.

Ахмадуудын зүгээс “Зээлгүй ахмад нь амьдралын боломжтой гэсэн үг биш. Төр ахмад настнуудаа зээлтэй, зээлгүйгээр нь ялгаварлаж болохгүй. Тэгш боломж олгож, бүгдэд нь гурван сая төгрөг олгох ёстой” гэдэг асуудлыг хөндөж тавьж байсан. Гэвч УИХ-аас 6 сая төгрөг хүртэлх тэтгэврийн зээлийг чөлөөлөх, зээлгүй ахмадад 1 сая төгрөгийн үнэт цаас олгох шийдвэр гаргасан юм.

Иймээс Засгийн газар дээрх асуудлыг шийдвэрлэх зорилгоор эхний ээлжинд үнэт цаасыг нь олгохоор ажиллаж эхэлжээ.