"Шимэгч" Японы шилдэг кинонуудын жагсаалтыг тэргүүлжээ

 Оскарын шагналт “Шимэгч” уран сайхны кино Японы шилдэг кинонуудын өнгөрсөн долоо хоногийн жагсаалтыг /box office/ тэргүүлж, сүүлийн 15 жилийн хугацаанд япончуудын хамгийн их сонирхон үзсэн Солонгос кино болжээ.

Японы “Kogyo Tsushinsha” цахим хуудсанд мэдээлснээр, БНСУ-ын найруулагч Бон Жун Хогийн уран бүтээл “Шимэгч” эмгэнэлт инээдмийн кино өнгөрсөн бямба, ням гарагийн байдлаар шилдэг кинонуудын жагсаалтын нэгдүгээрт жагссан бол дайны сэдэвт “1917” кино хоёрдугаарт бичигдсэн байна.

Солонгосын кино Японд нээлтээ хийсэн даруйдаа шилдэг кинонуудын тавдугаарт жагссаныхаа дараа нэгдүгээр байр луу ахисан анхны тохиолдол энэ ажээ. Японы олон нийтийн хэвлэл мэдээллийн хэрэгслүүдийн мэдээлж буйгаар, “Шимэгч” өнгөрсөн долоо хоногийн амралтын өдрүүдэд 300 сая орчим иен буюу 2.73 сая ам.долларын орлого олсноор нэгдүгээрт жагсжээ.

“Шимэгч” Японд өнгөрсөн нэгдүгээр сарын 10-нд нээлтээ хийсэн боловч өнгөрсөн долоо хоногт болсон Оскарын наадмаас дөрвөн шагнал хүртсэнээр үзэгчдийн сонирхлыг улам их татаж эхэлжээ. Өмнө нь БНСУ-ын “A Moment to Remember” кино 2005 онд Японы шилдэг кинонуудын жагсаалтыг тэргүүлсэн байна.