“Матрикс 4”-ийн зураг авалт эхэлжээ

Хоёрдугаар сарын эхнээс зураг авалт нь эхэлсэн “Матрикс” киноны дөрөвдүгээр ангийн эхний гэрэл зургууд цахим ертөнцөд таржээ.

Найруулагчаар нь Лана Вачовски ажиллаж байгаа The Matrix 4 кинонд 55 настай Киану Ривз, 52-той Керри-Энн Мосс нар Нео болон Тринитигийнхээ дүрийг бүтээж байгаа гэнэ.

Өнгөрөгч бүтэн сайн өдөр киноны зураг авалт Сан-Франциско хотод явагдсан бөгөөд гол дүрийн жүжигчид орлон тоглогчдынхоо хамт мотоциклтой шөнийн зураг авалтад оролцсон байна.

Кинонд юун тухай өгүүлэх нь одоогоор нууц байгаа бөгөөд ихэнх зураг авалт АНУ-д хийгдэх ч зарим нэгэн зураг авалтыг ХБНГУ-д хийх гэнэ.

Нээлтээ 2021 оны тавдугаар сарын 20-нд хийхээр киноны багийнхан төлөвлөөд байгаа аж.