Замын-Үүдэд коронавирусийн сэжигтэй хоёр тохиолдол илэрлээ

Дэлхий нийтийг цочирдуулаад байгаа коронавирусээр халдварласан иргэдийн тоо өдрөөс өдөрт нэмэгдэж байна.

Монгол Улсын нутаг дэвсгэрт өнөөдөр /2020.01.23/ коронавирусээр халдварласан сэжигтэй иргэн орж ирсэн нь тогтоогджээ. Баттай эх сурвалжийн мэдээлснээр тус иргэн Дорноговь аймгийн Замын-Үүдийн боомтоор автобусаар зорчиж, хил нэвтэрчээ.

Автобусанд 17 иргэн зорчиж явсан бөгөөд коронавирусээр  ээж, охин хоёр халдварласан байж болзошгүй байна гэх мэдээллийг албаны эх сурвалж баталлаа. 

Одоогоор тухайн иргэдийг тусгаарлаж, тандалт хийж байна. Харин яг энэ цаг мөчид энэ асуудлаар Эрүүл мэндийн яам шуурхай хурал зарлан хуралдаж байгаа бол УБТЗ-ын Замын-Үүд зангилаа өндөржүүлсэн бэлэн байдалд шилжээд байна. 

14:00 цаг: Эрүүл мэндийн яамнаас мэдээлэл хийлээ
 

ЭМЯ: ЗАМЫН-ҮҮДЭД ИРСЭН ЭЭЖ, ОХИН ХОЁРЫГ ТҮР ТУСГААРЛАСАН

Эрүүл мэндийн яамны Нийгмийн эрүүл мэндийн газрын дарга Д.Нарангэрэл "Замын-Үүд боомтоор хил нэвтэрч орж ирсэн иргэдээс коронавирусийн сэжигтэй тохиолдол бүртгэгдсэн. Одоогийн байдлаар коронавирусийн халдвар авсан эсэх нь тогтоогдоогүй байна. Дорноговь аймгийн Замын-Үүд боомтоор ээж нь толгой өвдсөн, зургаан настай хүүхэд нь халуурсан байдалтай Өвөр Монголын хоёр иргэн хил нэвтэрсэн. Ээжийг хүүхдийн хамт тусгаарлан, шинжилгээний хариуг хүлээж байна. Шинжилгээний сорьцын хариу маргааш /2020.01.24/ гарна. Шинжилгээний хариу сөрөг гарвал зүгээр. Эерэг гарвал дараагийн арга хэмжээг авна. Улирлын томуугийн дэгдэлт идэвхжиж байгаа учраас гадагшаа явсан, вирусийн голомттой газар руу зорчсон иргэд заавал шинжилгээ хийлгэхийг анхааруулж байна. Эрүүл мэндийн яамнаас өдөр бүр коронавирустай холбоотой асуудлаар мэдээлэл өгнө.

ЭЭЖ, ОХИН ХОЁРТОЙ АВТОБУСАНД ХАМТ ИРСЭН 15 ИРГЭНИЙГ ТУСГААРЛАЖЭЭ

Эх сурвалжаас авсан мэдээллээр Эрээн - Улаанбаатар чиглэлийн автобусанд зорчиж явсан зургаан настай хүүхдээс эхлээд сэжигтэй шинж тэмдэг анзаарагджээ. Энэ талаар Дорноговь аймгийн Эрүүл мэндийн газрын дарга Г.Энхцэцэгтэй холбогдож, мэдээлэл авлаа. Эрүүл мэндийн газрын дарга Г.Энхцэцэг “Ээжтэйгээ явсан зургаан настай хүүхэд халуурсан байна. Яг коронавирусийн халдвар эсэхийг хараахан тогтоогоогүй байгаа. Ханиад байхыг ч үгүйсгэхгүй. Хүүхдийн биеийн байдлыг үзэж, шинжилгээнд өгөөд байна. Автобусанд нийт 17 хүн зорчиж явсан. Тэднийг мөн тусгаарлаж, шинжилгээний хариу гартал өөр тийш явахыг хориглосон. Зургаан настай хүүхэд нь БНХАУ-ын Өвөр Монголын иргэн. Хүүхдийг ээжтэй нь хамт байлгаж байгаа” гэлээ.