Монгол Улс АНУ-ын Чикаго хотод Консулын газар байгуулна

УИХ-ын Аюулгүй байдал, гадаад бодлогын байнгын хорооны хуралдаанаар Консулын газар нээн ажиллуулах тухай асуудлыг хуралдаанд оролцсон олонх гишүүд дэмжсэн байна. АНУ-ын баруун, зүүн эргийн хотуудад амьдарч буй монгол иргэдэд консулын үйлчилгээ хүрч байгаа боловч АНУ-ын төвийн бүсэд, тодруулбал 8000 орчим монгол иргэн оршин суудаг Чикаго хотод консулын үйлчилгээг ойртуулах зайлшгүй шаардлага байгаа аж.

АНУ-ын Сан-Франциско хот дахь Ерөнхий консулын газар одоогоор долоон хүний орон тоотой үйл ажиллагаа явуулж байгаа бөгөөд үүнээс гурван орон тоог нь Чикаго хотод нээх Консулын газарт шилжүүлэн ажиллуулахаар төлөвлөсөн байна. Ингэснээр улсын төсвөөс нэмэлт зардал гаргахгүйгээр шинээр нээх Консулын газрын төсвийг шийднэ гэдгийг Гадаад харилцааны сайд Д.Цогтбаатар танилцуулгадаа онцолж байсан юм.