Цахилгаан станцуудын ажилтнуудыг цомхотгоно

Эрчим хүчний яамнаас өнөөдөр /2020.02.20/ өнгөрсөн онд хийж гүйцэтгэсэн ажлын үр дүнгээ танилцууллаа. Тус яам өнгөрсөн 2019 онд эрчим хүчний салбарын дунд хугацааны хөгжлийг бүрдүүлэх дунд хугацааны хөтөлбөрийг батлахдаа ухаалаг системд нэвтрэх суурийг тавихад анхаарчээ. Эрчим хүчний салбар өнөөдрийг хүртэл аваар гарч байх үед мэдээлдэг системтэй байсан бол энэ жилээс аваар гарахаас өмнө мэдээлэх урьдчилан сэргийлэх автомат систем рүү нэвтрэхээр төлөвлөжээ.

Салбарын сайд Ц.Даваасүрэнгийн мэдээлснээр, ирэх дөрвөн жилд эрчим хүчний салбарт ухаалаг систем нэвтрүүлэх төлөвлөгөөт ажлын хүрээнд хүний нөөцөд анхаарч, ажиллах хүчийг цомхотгохоор болсон байна. Өөрөөр хэлбэл, цахилгаан станцуудыг автоматжуулснаар хүний оролцоог бууруулж, мянган ажилтнаас 200 нь л ажиллах боломжтой аж.

Сайд Ц.Даваасүрэн “Эрчим хүчний салбарт ажиллаж буй хүний нөөц, бүтэц орон тоо хэтэрхий данхайсан байна. Өнөөдөр усан цахилгаан станцад нэг л хүн ажиллаж байхад цахилгаан станцуудад 500, 1000 орчим хүн ажиллаж байна. Энэ нь ухаалаг системийг дагасан бүтэц орон тооны ялгааг л харуулж байгаа юм. Цаашид бид автоматжуулсан өндөр технологийг эрчим хүчний салбарт нэвтрүүлэх хэрэгтэй байна. Ухаалаг систем дээр ажиллах инженер техникийн ажилтнуудаа сургах чиглэлд энэ жил анхаарна. Өндөр боловсрол эзэмшсэн хүмүүсийг салбарт нь дайчилж, зөвхөн мэргэжлийн хүмүүсийг л цахилгаан станцуудад ажиллуулах шаардлагатай” гэлээ.

Эрчим хүчний яамнаас энэ жил хүний нөөцийн хөгжлийн жил болгон зарлаж, инженер техникийн ажилтнуудыг сургах чиглэлд анхаарах юм байна.