Тархины хорт хавдрыг авах мэс заслын үеэр өвчтөнөөр хийл хөгжим тоглуулжээ

Их Британийн нэгэн эмнэлэг хөгжимчний тархинаас хорт хавдрыг нь авахдаа өвөрмөц аргыг анх удаа ашиглажээ.

53 настай Дагмар Тернэрийн тархинд ургасан хорт хавдар түүний хийл хөгжим тоглох ур чадварт нөлөөлж болзошгүй байсан гэнэ. Тодруулбал зүүн гарын нарийн хөдөлгөөнийг удирддаг тархины хэсэгт хорт хавдар ойрхон байжээ.

Тернэр нь өмнөд Английн Isle of Wight Symphony Orchestra чуулгын хөгжимчин юм байна. 2013 онд түүний тархинд хорт хавдар үүссэнийг анх оношилж байжээ.

Лондон хотын King’s College эмнэлгийн зөвлөх эмч, профессор Кейумарс Ашкан хөгжимчний ур чадварыг алдагдуулахгүйгээр хорт хавдрыг авах төлөвлөгөө боловсруулсан байна.

Ингээд хагалгааны дундуур өвчтөнийг сэрээж, хийл хөгжмийг нь тоглуулжээ. Энэ үед эмч нар тархины аль эс гарын хөдөлгөөнийг удирдаж байгааг хянаж, тэдгээрийг гэмтээхээс зайлсхийх арга хэмжээг авсан байна.

Тернэр хагалгааны үеэр Густав Махлер, Жорж Гершвин нарын “Summertime” нэртэй сонгодог жааз хөгжмийг тогложээ.

“Бид жил бүр 400 орчим тархины хорт хавдрын хагалгааг хийхдээ голдуу өвчтөний хэл ярианы чадварыг алдагдуулахгүйн тулд дасгал хийлгүүлэх арга хэрэглэдэг. Харин сая анх удаа өвчтөнөөр хөгжим тоглуулж хагалгааг хийлээ” гэж профессор Ашкан ярьжээ.

“Бид зүүн гарынх нь хөдөлгөөний удирдлагыг хөндөлгүйгээр хавдрын 90 хувийг авч чадлаа” гэж тэр нэмж хэлсэн байна.

13 настай хүүтэй Тернэр 10 настайгаасаа эхэлж хийл хөгжим тогложээ. Түүний хагалгаа өнгөрсөн сард болж, хагалгааны видео бичлэгийг өчигдөр олон нийтэд үзүүлжээ.

Тернэр хагалгаанаас хойш гурав хоногийн дараа эмнэлгээс гарсан бөгөөд удахгүй чуулгадаа хөгжим тоглож эхлэх юм байна.

Эх сурвалж: AFP