ОНЦГОЙ КОМИСС: БНСУ-тай хийх бүх нислэгийг ЗОГСООЛОО

БНСУ-Д КОРОНАВИРУСИЙН ХАЛДВАРЫН ҮЕД БҮХ ИРГЭДИЙГ ҮНЭГҮЙ ОНОШИЛЖ ЭМЧИЛНЭ

Эрүүл мэндийн сайд Д.Сарангэрэл “Иран, БНСУ, Итали болон бусад орнуудад шинэ коронавирусийн халдвар ноцтой болж байгаатай холбогдуулан энэ тархалт дэлхийн цар тахлын түвшинд хүрэх вий гэдэг болгоомжлол байгааг ДЭМБ-аас мэдэгдсэн. Өнөөдрийн байдлаар манай улсад Замын-Үүдэд 104, Дорнодод 5, ХӨСҮТ-д 9, нийт 134 тохиолдлыг тусгаарлаад байна. Энэхүү халдварт өвчнөөс сэргийлэх хамгийн чухал алхам бол хөдөлгөөний хязгаарлалт хийх юм. Тиймээс УОК-оос дээрх шийдвэрийг гаргасан. БНСУ-ын ерөнхийлөгч шинэ коронавирусийн халдварын үед бүх иргэдийн төлбөрийг дааж, оношилж эмчлэх тухай сайхан мэдээг дуулгасан. Гэхдээ ГХЯ, ЭМЯ Монгол улсынхаа иргэдэд онцгойлон анхаарал хандуулах чиглэлд  хамтран ажиллаж байгаа. Шинэ коронавирусийн халдвар 29 улсад илэрч, 79 мянган хүн халдвар аваад байна. Япон улсаас оношлуур авч ажиллаж байгаа. Амьсгалын замын цочмог халдвар болон уушгины чиглэлээр өвдсөн 60 тохиолдолд шинэ коронавирусийн оношлуураар оношилгоо хийсэн. Бүгд халдваргүй гэдэг шинжилгээний хариу гарсан.” гэлээ. 

Мөн тэрбээр "Улсын онцгой комиссын өнгөрсөн хурлуудаар ОБЕГ-ын харьяа сургалтын төвийг тусгаарлах шаардлагатай хүмүүст зориулж бэлтгэсэн. Солонгосын Тэгү хотод суралцдаг, амьдардаг 17 хүнийг Жаргалантын аманд байдаг уг сургалтын төвд өчигдөр тусгаарласан. Тэдний дунд ямар нэг зовуур илэрсэн хүн байхгүй. Биеийн байдал нь хэвийн байна. Түүнчлэн өчигдөр тус хотоос ирсэн 4 эмэгтэй, 2 хүүхдийг ХӨСҮТ-д тусгаарласан. Тэдний хоёр нь Монгол Улсад байнгын оршин суудаг хүмүүс байсан бол дөрөв нь нэг гэр бүлийн хүмүүс байсан. Тэд шинэ коронавирусийн халдвар тархаад байгаа Солонгосын Тэгү хотын сүмийн гэлэнмаа биш гэдэг нь тогтоогдсон" хэмээсэн юм.

ДЭГҮ ХОТООС ИРЖ БАЙГАА ИРГЭДЭД ТҮР ХУГАЦААГААР ВИЗ ОЛГОХГҮЙ БАЙХ ШИЙДВЭР ГАРГАСАН

ГХЯ-ны сайд Д.Цогтбаатар “Солонгосын төр засагтай байнгын харилцан холбоотой ажиллаж байгаа. Гуравдугаар сарын 2-ныг хүртэлх нислэг зогсоох шийдвэр гаргахдаа ч Солонгосын талтай харилцан тохиролцож байж шийдвэрлэсэн. Израйл, Шинэ Зеланд улсууд хилийн хязгаарлалтаа хийж эхэлсэн. АНУ, Австрали иргэддээ БНСУ руу зорчихгүй байхыг анхааруулж байна. Бид ярилцаж байгаад мөн ийм арга хэмжээ авна. Манай улсын иргэд коронавирустэй холбоотой асуудлаар эмнэлэгт үзүүлэх тохиолдолд ямар нэгэн төлбөр тооцоо шаардахгүй гэсэн мэдээллийг өгсөн. Үл ойлголцол үүсгэхгүй байх тал дээр ажиллаж байна. Дэгүд байсан, зорчсон, ирж байгаа иргэдэд түр хугацаагаар виз олгохгүй байх шийдвэрийг гаргасан. Мөн БНСУ-д нийт 48.000 монгол иргэн ажиллаж, сурч, амьдарч байна. Хууль ёсоор ажиллаж амьдарч байгаа иргэд хорио цээрийн эдгээр өдрүүдэд визийн хугацаа дуусч байгаа бол Солонгос Улсын Засгийн газраас хөнгөлөлт үзүүлж манай орны төдийгүй бусад улс орны иргэдэд 50 хүртэл хоногоор визийн сунгалт үзүүлнэ гэдгээ мэдэгдсэн” гэлээ.

Үүнээс гадна Аймаг нийслэлийн засаг дарга нарт үүссэн нөхцөл байдалтай уялдуулан болзошгүй эрсдлийн үед ашиглах зориулалтаар бүх эмнэлэг, сувилалын газруудын бэлэн байдлыг хангахыг Улсын Онцгой комиссоос үүрэг болгожээ.

Улсын Онцгой комисс дөнгөж сая хуралдаж дууссан бөгөөд шийдвэрлэсэн асуудлынхаа талаар мэдээлэл хийж байна.

Хуралдаанаар БНСУ-ын Бусан, Инчеон хотууд руу хийх бүх нислэгийг 2020 оны гуравдугаар сарын 2-ныг хүртэл түр хугацаагаар зогсоох шийдвэр гаргалаа. Энэхүү шийдвэр маргааш буюу хоёрдугаар сарын 25-наас хэрэгжиж эхэлнэ. Дамжин өнгөрч байгаа транзит тээврийн зорчигчдыг тусгайлсан зохион байгуулалтын дагуу Инчеоны нисэх онгоцны буудлаас тээвэрлэн авчрахаар болжээ. Солонгосын талд дипломат шугамаар саналаа тавьж, харилцан тохиролцсоны үндсэн дээр энэхүү шийдвэрийг гаргаад байна. 

Энэ талаар Зам тээврийн хөгжлийн сайд Б.Энх-Амгалан “Гуравдугаар сарын 2-ныг хүртэл МИАТ, Кореан эйр, Асиана эйрлайнс авиа компаниудын нийт 18 нислэг байна. Бусанаас 4 удаагийн нислэг байгаа бөгөөд 367 зорчигч тийзээ захиалсан. Нийтдээ 3668 хүн тийзээ авсан бол 2504 хүн явах захиалга өгсөн. Эдгээр тийзүүд үнэгүй буцаагдана. Бид авиа компаниудад хорио тавигдсаны дараа одоо авсан тийзээр зорчих бололцоо, боломжийг хангаж өгөх чиглэлийг өгч байгаа. Солонгосын чиглэлд зургаан авиа компани нислэгээ цуцалсан. Мөн тархалтыг газар авахуулахгүйн тулд агаарын хөлөгт халуунтай хүмүүсийг суулгахгүй байх, шалгалтыг нарийн явуулах, халдварын бүсээс ирсэн хүн суулгахгүй байхыг онцгой анхаарах чиглэлийг авиа компаниудад өгсөн” гэлээ.

Улсын онцгой комиссийн зургаа дахь удаагийн хуралдаан өнөөдөр 14:00 цагт болохоор товлогдсон.

Ерөнхий сайд У.Хүрэлсүх УОК-д үүрэг даалгавруудыг өгсөн байна. Үүний дотор БНСУ-тай хийж буй нислэгүүдэд яаралтай арга хэмжээ авах чиглэл өгсөн юм. Хуралдааны дараа мэдээлэл өгөх бөгөөд бид гарсан шийдвэрийг удахгүй хүргэх болно.

Шинэ төрлийн коронавирусийн халдвар ойрын өдрүүдэд БНСУ-д эрчимтэй тархаж, анхаарлын төвд ороод буй. Өнөөдөр буюу хоёрдугаар сарын 24-ний байдлаар тус улсад Covid-19-өөр өвчилсөн хүний тоо 763-д хүрч, 7 хүн нас баржээ.

Улсын Онцгой комисс энэ удаагийн хуралдаанаар:

• Шинэ коронвирусээс урьдчилан сэргийлэх арга хэмжээ
• БНСУ дахь Монгол Улсын иргэдтэй холбоотой арга хэмжээ
• БНХАУ-аас ирэх Монгол Улсын иргэдийн асуудал болон нүүрс, газрын тосны тээвэрлэлтийн нөхцөл байдал
• Экспортын зарим арга хэмжээ
• Цагаан сарын өдрүүдээр автозам хязгаарласан арга хэмжээнүүдийг хэлэлцэнэ.